د کډوالو چارو وزارت: په تېرو دوه مياشتو کې شپېته زره کورنۍ بېځايه شوې دي

مزارشريف (پژواک، ۱۳زمری ۱۴۰۰) : د افغانستان د کډوالو او بېرته راستنېدونکو چارو وزارت مسوولين وايي چې په تېرو دوه مياشتو کې په ټول هېواد کې شاوخوا ۶۰ زره کورنۍ بېځايه شوي، چې لوی لامل يې روانه جګړه ده.

د ياد وزارت د پاليسۍ او پروګرامونو معين شېرعلم امله وال د زمري په ۱۳مه، مزارښار کې داخلي بېځايه شويو او راستنېدونکو افغانانو ته د برېښنایي تذکرو د ورکړې ځانګړې څانګې فعالېدو پر مهال وويل چې حکومت هڅه کوي څو له بېځايه شويو کورنيو سره بېړنۍ مرستې وکړي.

هغه زياته کړه چې په هېواد کې د داخلي بېځايه شويو او بېرته راستنېدونکو د کره شمېرو معلومولو په خاطر حکومت پلان نيولی، څو هغوی ته برېښنايي پېژندپاڼې ورکړي.

د امله وال په وينا، له دې وړاندې په کابل او هرات ولايتونو کې دغه ځانګړي مرکزونه فعال شوي دي.

نوموړی زياتوي، لاهم په افغانستان کې د بېځايه شويو کورنيو او بېرته راستنېدونکو دقيق ارقام نشته او په خبره يې له همدې امله د مرستو بهير هم وخت نا وخته له ستونزو سره مخ کېږي.

د کډوالو چارو وزارت د پاليسۍ مدير وايي چې په تېرو دوه مياشتو کې په ټول هېواد کې ۶۰ زره کورنۍ له خپلو کورونو بېځايه شوې دي.

د هغه په خبره، د خلکو د بېځايه کېدو لوی لامل روانه جګړه او له هغې وروسته راغلې وچکالي ده.

امله وال زياته کړه چې حکومت له نړيوالو خيريه موسسو سره په ګډه کار کوي څو د هغو کورنيو لاسنيوی وکړي چې بېړنيو مرستو ته اړتیا لري.

ده همدا راز وويل چې بلخ کې د برېښنایي تذکرو د وېش برخه د غوښتونکو د زياتوالي له امله ورو روانه ده.

په ورته مهال د بلخ د احصايې رييس محمد بشير محمود پژواک ته وويل چې دوی هڅه کوي، څو د برېښنايي پېژندپاڼو برخه کې شته ستونزې حل کړي.

هغه وويل چې شاوخوا ۱۵۰ زره کسانو د برېښنايي تذکرو د اخيستو لپاره نومونه ثبت کړي، خو دوی په ورځ کې يواځې د ۹۰۰ کسانو د بایومټريک وړتیا لري.

محمود زياتوي چې ټاکل شوې وه په بلخ کې د برېښنايي پېژندپاڼو د وېش دوه نور مرکزونه هم فعال شي؛ خو په وينا يې چې د ماليې وزارت له خوا د پروژو توقف له امله تر اوسه ياد مرکزونه نه دي پرانيستل شوي.

هغه وايي، دوی هڅه کوي چې له شته امکاناتو څخه په استفادې ډېرو خلکو ته برېښنايي پېژندپاڼې ورکړي.

له دې سره يو شمېر هغه کسان چې د برېښنایي تذکرو لپاره نومونه ثبت کړي وايي چې په مياشتو مياشتو هم نوبت نه ور رسېږي.

محمد معروف د مزار‎ښار اوسېدونکی دی چې نږدې درې نيمې مياشتې وړاندې يې د برېښنايي پېژندپاڼو لپاره نومونه ثبت کړي، خو تر اوسه هم د بایومټريک نوبت نه دی ور رسېدلی.

هغه وايي، ډېر داسې کسان شته چې برېښنایي تذکرو ته په بېړني ډول اړتيا لري، خو نوبت ورته نشته دی.

نوموړی له حکومته غواړي چې په مزار کې دې د برېښنایي تذکرو د وېش مرکزونه زيات کړي.

له دې سره د بلخ ولايت مقام مرستياله ربابه نايبي وايي چې د برېښنایي تذکرو د وېش برخه کې د کارمندانو د ناغېړۍ په اړه دوی ته هم راپورونه رسېدلي دي.

هغې زياته کړه چې د احصايې رياست له مسوولينو سره يې جدي خبرې کړي او هغوی ژمنه کړې چې په ورځ کې به د برېښنايي تذکرو د وېش شمېر ۱۵۰۰ ته ورسوي.