په هلمند کې خلک د بانکونو تړل کېدو له امله له سختو ستونزو سره مخ دي

لښکرګاه (پژواک، ٩ وږى ١٤٠٠): د هلمند اوسېدونکي شکايت کوي چې په دغه ولايت کې د بانکونو تړل کېدو له امله له سختو ستونزو سره مخ دي او د بانکونو پر ژر خلاصېدو ټينګار کوي.

وروسته له هغه چې طالبانو د کابل په ګډون نږدې پر ټول افغانستان تسلط پيدا کړ، د افغانستان بانک په ګډون ټولو بانکونو خپل فعاليتونه د هېواد په کچه بند کړل.

خو څو ورځې مخکې د طالبانو وياند ذبيح الله مجاهد په کابل کې د يوې خبري غونډې پر مهال وويل چې د وږې له درېيمې نېټې بايد ټول بانکونه خپل فعاليت پيل کړي.

که څه هم چې له يادې نېټې وروسته د افغانستان بانک په ګډون د کابل بانک او عزيزي بانک مرکزي څانګو فعاليت پيل کړ خو بيا هم د خلکو د ګڼې ګوڼې له امله ډېر کسان نه شي کولاى پر وخت پيسې ترلاسه کړي.

په ورته وخت کې د افغانستان بانک هم د يوه مکتوب په خپرولو سره ويلي چې خلک يواځې يو ځل په اوونۍ کې کولاى شي له بانکونو دوه سوه ډالر او يا هم شل زره افغانۍ ترلاسه کړي.

د بانکونو په فعاليت کې د خنډ او ځنډ رامنځته کېدو له امله د هېواد په کچه ډېری مالي فعاليتونه هم په ټپه ولاړ دي.

په دې اړه د لښکرګاه ښار اوسېدونکي ميرزا محمد پژواک ته وويل چې له تېرې يوې مياشتې راهيسې په دغه ولايت کې بانکونه فعاليت نه کوي.

دى وايي: ((د ډېرو خلکو پيسې په بانکونو دي، که بانکونه خلاص نه شي، په بازار کې راکړه ورکړه به څنګه ترسره شي، دا يو لوى مشکل دى.))

دغه راز د لښکرګاه ښار بل اوسېدونکي عبدالبصير پژواک ته وويل چې د بانکونو تړل کېدو له امله له خلکو سره پيسې خلاصې شوې او اوس له ستونزو سره مخ دي.

هغه زياته کړه: ((له خلکو سره هيڅ پيسې نشته، سودا په څه شي واخلي، دا يو لوى بحران دى، دا بايد نور ختم شي.))

د دغه ولايت يو شمېر نورو اوسېدونکو هم ورته څرګندونې وکړې او د اسلامي امارت له مشرانو يې غوښتنه وکړه چې هر څو ژر د بانکونو فعاليت بېرته پيل کړي.

د يادونې ده، د هلمند ترڅنګ په پلازمېنې کابل او نورو ولايتونو کې هم خلک د بانکونو د تړل کېدو له امله له ګڼو ستونزو سره مخ دي او ټينګار کوي چې بانکونه بايد خپل عادي فعاليت بېرته پيل کړي.