کابل(پژواک، ۱۷ وږی ۱۴۰۰): خلکو د افغانستان د نوې سرپرستې کابینې په اړه پر خواله رسنیو غبرګونه ښودلي؛ ځینو نیوکې کړي چې کابینه مسلکي او ټولګډونه نه ده، خو ځینو یې ملاتړ کړی، وایي تر مسلک او تخصص؛ تقوا او دیانت ډېر اړین دی.
طالبانو د زمري په ۲۴ مه کابل ونیو او اوس یې ټول هېواد په واک دی.
هغوی ویلي وو، داسې نوی ټولګډونه حکومت به جوړ کړي چې ټول ملیتونه او سیاسي ګوندونه به په کې ځان وویني او د کور دننه او بهر به ملاتړ ولري، خو تېر ماښام یې سرپرسته کابینه اعلان کړه او ویې ویل چې دغه ګام یې د حکومتي چارو د پرمخ بېولو په موخه کړی. محمد حسن اخند د دغه سرپرست حکومت رئیس الوزرا او عبدالغني برادر او عبدالسلام حنفي يې مرستيالان دي.
له دغو درېیو کسانو پرته، ۳۰ تنه – چې ډېر یې دینی عالمان دي- د وزارتونو او خپلواکو ریاستونو سرپرستان او ځینې یې مرستیالان اعلان شوي او په پام کې ده چې د یو شمېر پاتې وزارتونو او مستقل ریاستونو لپاره به سرپرستان وروسته اعلان شي.
د سياسي چارو شنونکي قاضي محمد حسن حقيار پژواک خبري اژانس ته وویل چې د طالبانو د اوسني سرپرست حکومت جوړښت د هغوی د تېر پړاو (۱۳۷۳- ۱۳۸۰) حکومت له جوړښت سره توپير نه لري؛ هلته هم رياست الوزراء و او دوه مرستيالان يې لرل او اوس هم هماغه بڼه لري.
خلکو د یادې سرپرستې کابینې په اړه په ټولنیزو رسنیو کې بېلابېل غبرګونونه ښودلي:
یو شمېر خلک: کابینه مسلکي او ټولګډونه نه ده
ډاکټر احمد سرمست پر خپله ټويټرپاڼه ليکلي:«د طالبانو د حکومت ټول ۱۷ غړي هغه کسان دي چې د ملګرو ملتونو سازمان په تور نوملړ کې دي او هیڅ مسلکي کس په کې نشته؛ نو څنګه ورته ويلای شو چې دغه حکومت ټولګډونه او فراګير دی.» د هغه په وینا، د طالبانو د کابينې د ټولګډونوالي په اړه چې کوم څه تر سترګو کېدای شي، هغه «ملاتوب» دی.
عصمت عاصم هم لیکي:« درې هفتې یې پر دې تېرې کړې چې داسې یو ټولشموله حکومت جوړوو چې هر قشر په کې خپل ځان وګوري، مګر دا نو څه ډول ټولشموله حکومت شو چې د جوماتونو ملایان او د مدرسو قاریان دي؟»
احمد جميل پوپلزی هم د کابینې پر جوړښت نیوکه کوي، لیکي: «کابینه له ۱۵ ملا صیبانو، نهو مولوي صیبانو، درېیو حاجي صیبانو، دوو شیخ صیبانو او دوو قاري صیبانو جوړه شوې ده.»
مرتضی سفري هم پر یاده کابینه نیوکه کوي، پر خپله ټويټرپاڼه ليکي:«هغه ټولنه چې په دیموکراسۍ کې ماتې وخوري، پر اقتدارغوښتنې (استبداد) محکومیږي.»
یو شمېر نورو کسانو هم پر اعلان شوې سرپرستې کابینې نیوکې کړي.
ځینې کسان: پر نوې کابینه نیوکې مه کوئ، پخوانۍ هم مسلکي نه وه
محمد شريف عمرزی پر خپله فیسبوک پاڼه د نوي کابینې له امله «ټولو افغانانو» ته مبارکي وایي او زیاتوي چې مخکې له کار کولو که په نظام نيوکې ونه شي غوره به وي.
دی زياتوي:«پاتې د تخصص او تعهد خبره شوه؛ هغه په پخواني نظام کې کله تر ډېره بريده په پام کې نيول شوې وه - او اکثره وزارتونه به په کلونو د سرپرستانو له لوري اداره کېدل، خو دومره انتقادونه نه وو - د هېواد د خير او فلاح لپاره دعا وکړئ او حد اقل په اوسني امنيت شکر وباسی چې الله تعالی د نورو نعمتونو پېرزوينه هم را باندې وکوي.»
شاه محمود شاهين هم لیکلي: «د ډاکټر غني په کابينه کې د عدليې وزير نيمچه ډاکټر و، د مخابراتو وزيره د لابراتوار فارغه وه؛ وزير داخله یې ترتړو و، عالې تحصيلاتو وزير یې د يو مکتب استاد او له امريکا راغلی و، د افغانستان بانک رييس یې پارلمان رد کړ، خو بيا هم هغه ټامي تر اخره په زور ناست و؛ د وزارت داخله معينه شل کلنه وه، د وازرت دفاع معينه ګل اندامه وه؛ تاسو ډیموکراټان چې په زور پر خلکو ټاميان منلی شي، ملايان یې نه شي منلی.»
دی د تېر حکومت پلویانو ته په خطاب کې وايي، چې د هغه مهال پر وزيرانو مو نيوکه نه منله، اوس هم د نيوکې حق نه لرئ، ولې او په کومو سترګو به نيوکه کوئ؟
عبدالاول بشارت پر خپله فیسبوک پاڼه ليکلي چې تر مسلک او تخصص؛ تقوا او دیانت اړین دی، مسلک او تخصص د یو کار د ښه تر سره کولو لپاره لاره ښیي؛ خو تقواء او دیانت سړی دې ته اړ باسي چې په سمه لاره ولاړ شې او له انحرافه وژغورل شې.
دی زیاتوي: «حقیقت دا دی، چې د حکومت کابینه مو مخکې هم غیرمسلکي وه، ډېری غړي یې بې سواده وو، د ځیني ذواتو یې حتی تعلیمي او تحصیلي اسناد هم مطلق جعلي او تزویري وو. پرديپاله، ټامیان او غله وو، هیڅ نوع تعهد او زړه سوی یې له دې وران وطن او مظلومو خلکو سره نه درلود؛ غلا، فساد، چور، فحشاء ارتشاء او… اوج ته رسېدلي وو، ملت له دې حالته سخت زیات وکړېده، اوس نو پرېږدئ چې ملا صاحبان خپل کارونه خپله وکړي او حق یې دی.»
نجيب الله خان هم پر فېسبوک پاڼه ليکلي
