لښکرګاه (پژواک، ۲۲ تله ۱۴۰۰): د هلمند په مرکز لښکرګاه کې د کډوالو نړیوال سازمان/ UNHCR له خوا له ۲۰۰ بېځایه شوو کورنیو نغدي مرسته وشوه.
دا هغه کورنۍ دي چې له نورو هېوادونو او یا د تېرو جګړو پر مهال له بېلابېلو ولسوالیو بېځایه شوې او اوسمهال په لښکرګاه کې په بد وضعیت کې ژوند کوي.
په هلمند کې د کډوالو نړیوال سازمان مرستیال جاوېد احمد واحدي پژواک خبري اژانس ته وویل، دغه ۲۰۰ کورنۍ د یوې سروې په پایله کې مشخصې شوې او مستحقې پېژندل شوې وې چې د نغدو پیسو مرسته ورسره وشوه.
هغه زیاته کړه، هرې کورنۍ ته ۱۹۵ ډالر ورکړل شول څو خپلې لومړنۍ اړتیاوې ورباندې پوره کړي.
دی وايي، په پلان کې ده د دغه ولایت ۱۷۷۵ کورنیو ته دغه ډول مرستې ووېشل شي چې سروې يې په ۲۰۱۹ او ۲۰۲۰ زېږدیزو کلونو کې شوې وه.
د ده په په خبره، پر یادو کورنیو به دغه مرسته په څو پړاوونو کې ووېشل شي.
هغه کسان چې دغه مرستې یې ترلاسه کړې، خوښ دي او وايي له دې لارې به وکړای شي څو د خپلو کورنیو اړتیاوې پوره کړي.
د سید جان په نوم یوه کډوال چې مرسته یې ترلاسه کړې وه، پژواک ته وویل، تېرو جګړو خلک سخت ځپلي او له خپلو کورونو بېځایه کړي دي او اوس په داسې بد وضعیت کې دي چې خپلو کورونو ته هم نه شي ستنېدلای.
ده ترلاسه کړې مرسته غنیمت وګڼله خو غوښتنه یې وکړه چې حکومت او نړیواله ټولنه دې دغه راز نورې مرستې هم وکړي.
د حبیب الله په نوم یوه بل کډوال پژواک ته وویل: ((له تېرو څو ورځو راهیسې مو په کور کې د خوراک لپاره څه نه درلودل خو دغې مرستې مو پرده وکړه.))
دی هم د مرستو پر دوام ټینګار کوي او وايي، خلک ډېر بېوزلي شوي، حکومت باید نړیواله ټولنه وهڅوي چې له غربت ځپلو وګړو سره دوامداره مرستې وکړي.
د یادونې ده، د کډوالو نړیوال سازمان ترڅنګ د خوراک نړیوال سازمان هم په هلمند کې له سلګونو بېوزو وګړو سره بېلابېلې مرستې کړې دي.
موده مخکې د خوراک نړیوال سازمان خبر ورکړی چې په افغانستان کې ډېر خلک د خوړو له کمښت سره مخ دي، که حالت همداسې دوام وکړي نو تر راتلونکي زېږدیز کال پورې به ۹۷ سلنه وګړي بېړنیو مرسته اړتیا ولري.
