په بلخ کې وزګارتيا او د خوراکي توکو لوړو بيو خلک اندېښمن کړي دي

مزارشريف (پژواک، ۳ لړم ۱۴۰۰): د بلخ اوسېدونکي وايي چې له يوې خوا د ژمي موسم په را رسېدو دی او له بل لوري د کار نشتون او په بازارونو کې د خوراکي توکو د قيمتونو لوړوالي له ګڼو ستونزو سره مخ کړي دي.

دوی وايي چې د حکومت له هڅو سره سره لا هم په مزارښار کې د خوراکي توکو قيمتونو کې د پام وړ کموالی نه دی راغلی.

له دې سره د بلخ سوداګرۍ خونه وايي چې له بهرنيو هېوادونو څخه د وارداتو نويو تړونونو څخه وروسته ډېره هیله مندي شته چې د خوراکي توکو بيې ټيټې شي.

سره له دې چې بلخ کې د حيرتان بندر له لارې تجارتي راکړه ورکړه عادي حالت ته ګرځېدلې ده؛ خو بيا هم خلک شکايت کوي چې په بازارونو کې د خوراکي توکو قيمتونو کې د پام وړ بدلون نه دی راغلی.

دوی وايي چې له يو خوا د ژمي موسم او بل لور ته د کار نشتون او د خوراکي توکو لوړو بيو دوی له جدي ستونزو سره مخ کړي دي.

د مزارشريف اوسېدونکی سخيداد وايي چې هره ورځ له يوه لاس ګاډي سره د مزدورکارۍ په موخه ښار ته راوځي.

نوموړي پژواک ته وويل چې پخوا به يې هره ورځ شاوخوا درې سوه افغانۍ کار کاوه؛ خو اوس يې ورځنی مزد له ۱۵۰ افغانيو نه لوړېږي.

د هغه په وينا، سره له دې چې بيکاري زياته شوې، مقابل کې يې د خوراکي توکو نرخونه هم له اسمان سره خبرې کوي.

سخيداد وويل: ((ژمی راغی، له دې وروسته روزمره کارونه نور هم کمېږي، په بازار کې اوړه، غوړ او وريجو اخيستل بيخي ناممکن شوي، نو ښکاره خبره ده که وضعيت همداسې دوام وکړي نو يو شمېر خلک به د لوږې له امله تلف شي.))

نوموړي له حکومت څخه غوښتنه وکړه چې خلکو ته دې کار پيدا کړي او په ضمن کې دې نرخونه کنټرول کړي.

د مزارشريف د کفايت مارکېټ دکاندار عبدالکريم پژواک ته وويل چې د تېرې اوونۍ په پرتله په دې اوونۍ کې د اوړو او غوړيو په بيو کې ډېر لږ کمښت راغلی دی.

هغه زياتوي چې د خلکو خراب اقتصادي وضعيت ته په کتو نرخونه اوس هم ډېر لوړ دي.

نوموړي وويل: ((د تېرې اوونۍ په پرتله د يوې پنځوس کيلويي بورۍ په قيمت کې ۲۰۰ افغانۍ کموالی راغلی، د يوې لس لېټره بوشکې غوړو بيه کې له سل تر يو سل او پنځو افغانيو کمښت راغلی همداسې نور توکي؛ خو دا کفايت نه کوي.))

د هغه په خبره، په ژمي موسم کې معمولا کارونه کمېږي او ډېر خلک به د اړينو خوراکي توکو د پېرلو وس و نه لري.

مزارشريف کې د خوراکي توکو د يوه پلورنځي مدير رحمت الله پژواک ته وويل چې حکومت بايد بازارونو کې د توکو نرخونه کنټرول کړي.

هغه زياته کړه چې د وارداتو برخه کې د څه نا څه ستونزو تر څنګ يو شمېر سوداګر احتکار هم کوي چې له امله يې د توکو قيمتونه لوړ شوي دي.

نوموړي وويل چې د بازارونو روان وضعيت نور د زغم وړ نه دی.

هغه زياتوي: ((تر ډېره پورې په بازارونو کې هر څوک په خپل سر دي چې څنګه يې خوښه وي د توکو لپاره نرخ ټاکي، دا بايد کنټرول شي، اوس خو ويل کېږي چې د وارداتو په مالياتو کې هم کموالی راغلی؛ نو اړينه ده چې د توکو نرخونه ارزانه شي.))

په ورته مهال بلخ کې د سوداګرۍ خونې مسوولين هيله مندي ښيي چې د وارداتو په برخه کې د سوداګرو له نويو قراردادونو سره به د توکو په بيو کې کموالی راشي.

د بلخ د سوداګرۍ خونې د ارتباطاتو مسوول حسن انصاري پژواک ته وويل چې له تېرو شاوخوا دوه اوونيو راهیسې په مزارشريف کې د خوراکي توکو نرخونه په يوه حالت کې دي.

خو هغه زياتوي چې د ځينو توکو لکه اوړو په بيو کې څه نا څه کموالی هم راغلی دی.

انصاري زياته کړه چې لا هم ډېری واردات د پخوانيو قراردادونو له مخې ترسره کېږي او هيله يې وښوده چې د نويو قراردادونو په کولو سره به بيې راټيټې شي.

انصاري وويل: ((زموږ ډېری سوداګر اوس هم د پخوانیو قراردادونو له مخې واردات کوي چې له همدې امله د خوراکي توکو نرخونو کې پام وړ کموالی نه راځي؛ خو د نويو تړونونو په منعقد کېدو سره به بيې نورې هم راټيتې شي.))

نوموړی هم د ژمي په را رسېدو او د کار نشتون له امله په بازار کې د خوراکي توکو لوړوالی د اندېښنې وړ بولي.