ترینکوټ( پژواک، ۱۲ لړم ۱۴۰۰) : د اروزګان ولایتي روغتون کې په لومړي ځل په نشو د روږدو کسانو د درملنې لپاره شل بستریزه څانګه فعاله او خدمات یې پیل کړل.
د دغه روغتیایي مرکز مالي او روغتیایي چارې د INL موسسې په مرسته ترسره کېږي.
د دغه ولایت مسوولینو نن د یادې څانګې د پرانيستې مراسمو پر مهال وویل، په ياد روغتون کې به د لومړي ځل لپاره د ۴۵ ورځو په موخه په نشه یي توکو د اخته کسانو وړيا درملنه کېږي چې تر درملنې وروسته د يوه کال لپاره په خپل کور کې تعقيب کېږي ترڅو په بشپړ ډول روغ شي.
د یاد روغتون مشر قدرت الله محمدي وایي، روغتیاپالان به هڅه وکړي چې دغه موده کې روږدي کسان دې ته وهڅوي چې نشه پرېږدي او په ټولنه کې د عادي کسانو په څېر ژوند وکړي.
هغه وویل، هیله لري چې راتلوونکي کې د دغه روغتیایي مرکز خدمات پراخه او تر ولسوالیو پورې وغځوي.
نوموړي له کورنیو او مشرانو وغوښتل چې روږدي کسان د درملنې لپاره دغه مرکز ته ورولېږي .
له دغه اقدام څخه روږدي کسان هم خوښ دي.
د اروزګان د مرکز ترینکوټ ښار یوتن روږدی کس سردار وایي، دوی ته له نشې څخه د خلاصون لاره نه معلومېده او نه هم تراوسه کومه مرجع وه چې درملنه يې وکړي.
د اروزګان د نشه یي توکو پر وړاندې د مبارزې ریاست مسوولینو په وينا، په ياد ولایت کې له ۱۵ زرو څخه تر ۲۰ زره پورې کسان چې ښځې او ماشومان هم په کې شامل دي پر نشو روږدي دي.
