چاریکار (پژواک، ۱۵ لېندۍ ۱۴۰۰): امنیتي ځواکونو د پروان په مرکز چاریکار کې د دوو جلا عملیاتو په ترڅ کې اته سوه لېټره شراب او د الکولي مشروباتو یوه کارخانه کشف او ترلاسه کړي او ورسره په تړاو یې لس کسان نیولي دي.
د پروان د اطلاعاتو او فرهنګ رییس مولوي شمس الحق مبشر پژواک خبري اژانس ته وویل چې نن د چاریکار ښار د اوومې امنیتي حوزې موظفینو د یاد ولایت د مرکز اړوند په تتمدرې سیمه کې ۸۰۰ لېټره شراب کشف او ضبط کړي دي.
هغه زیاتوي چې د یادو مشروباتو په تړاو یې لس کسان نیولي دي.
د یوه بل خبر له مخې، د چاریکار ښار د اوومې امنیتي حوزې امر ملنګ جان د جزئیاتو له ورکولو پرته وایي چې نن یې د کابل ښار له اوولسمې امنیتي حوزې سره په همغږۍ په پروان کې د الکولي مشروباتو یوه کارخانه کشف او ضبط کړې خو ورسره په تړاو څوک نه دي نیول شوي.
دا په داسې حال کې ده چې تېره اوونۍ هم د پروان په جبل السراج ولسوالۍ کې ۶۵ کیلوګرامه چرس نیول شوي وو.
