چاریکار (پژواک، ۲۲ لېندۍ ۱۴۰۰): د پروان امنیه قومانداني وایي چې د کابل- پروان پر لویه لاره د دوو ترافیکي پېښو په ترڅ کې پنځه امنیتي سرتېري مړه او ۲۱ نور ټپیان شوي دي.
د پروان امنیې قوماندانۍ د امنیت امر اول ګل حقپرست پژواک خبري اژانس ته وویل چې یادې پېښې پرون د پروان ولایت اړوند د بګرام دوه سړکه سیمه کې شوې دي.
د هغه په خبره، دغه پېښې هغه مهال رامنځته شوې چې د امنیتي ځواکونو یو کاروان له کابله د بګرام هوایي ډګر ته روان و.
هغه زیاته کړه، په لومړۍ پېښه کې یو رينجر موټر چپه شوی چې له امله یې پنځه امنیتي سرتېري مړه او څلور نور ټپیان شوي دي.
د حقپرست په خبره، په دویمه پېښه کې هم یو موټر له سړکه وتلی او چپه شوی چې په پایله کې یې ۱۷ امنیتي سرتېري ټپیان شوي دي.
