کابل (پژواک، ۴ مرغومی ۱۴۰۰): مولوي شاه محمد شاهد د ریاست الوزرا د حکم پر اساس د لویې څارنوالۍ د سرپرست او د دغې ادارې د مالي او اداري چارو مرستیال په توګه وګومارل شو.
دغه مطلب د لویې څارنوالۍ له خوا په خپره شوې خبرپاڼه کې راغلی او زياته شوې چې د نوموړي د معرفي غونډه نن وشوه.
سرچينه کاږي، د چارو ادارې استازي مولوي عبدالباقي منصور ګډونوالو ته د لويې څارنوالۍ د سرپرست او مالي او اداري چارو مرستیال د ریاست الوزرا حکم ابلاغ کړ.
منصور وویل، د هر نظام ستنې پر اداري سیستم ولاړې دي او هر نظام که پرمختګ غواړي، باید د اداري سیستم د پياوړتیا لپاره هڅې وکړي.
ده زياته کړه، موږ او تاسې ټولو ته په کار ده چې د دې مظلوم ملت او افغانستان خدمت په سمه توګه وکړو.
د لويې څارنوالۍ سرپرست او د دغې ادارې مالي او اداري چارو مرستیال مولوي شاه محمد شاهد لویه څارنوالي د اوسني نظام په چوکاټ کې یوه مهمه اداره وبلله او دا اداره يې د تحقیق او په شرعي محکمه کې د دعوا د اقامې تر څنګ د شريعت او قانون د یوشان پلي کېدلو بنسټیزه مرجع یاده کړه.
ده ډاډ ورکړ چې لویه څارنوالي به د ملت پر وړاندې مسووله او د اسلامي شریعت او قوانینو په اړه یوه بې طرفه اداره وي.
نوموړي ژمنه وکړه چې دا اداره به په خپلواکه توګه اجراات کوي.
شاهد زیاته کړه: «اسلامي شریعت او قوانین به پر ټولو یو شان پلی کېږي او په دې برخه کې هیڅ ډول استثنا نشته.»
د خبرپاڼې د معلوماتو له مخې، د لویې څارنوالۍ سرپرست د دغې ادارې له ټولو پخوانیو متخصصو، کارپوه او پاک نفسه کارکوونکو څخه غواړي چې دندو ته حاضر او د اوسني نظام تر چتر لاندې خپل وطن ته د خدمت جوګه شي.
همداراز په دې غونډه کې شیخ الحدیث مولوي عبدالحمید حماسي د دغې ادارې له ټولو کارکوونکو غوښتنه وکړه، چې نظام کې د اصلاحاتو او خلکو ته د خدمت کولو په موخه لاس یو کړي.
هغه دا د ټولو ګډ مسوولیت وګاڼه چې له ظالمه د مظلوم حق واخلي.
Views: 1453
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن