کابل (پژواک، ۱۵ مرغومی ۱۴۰۰): په ایټالیا کې د افغانستان سفارت وروسته له هغه فهیم کشاف له سفارته بهر کړ چې ځان یې سفیر معرفي کاوه او پر سفیر یې د برید قصد درلود، خو افغان حکومت د سفیر په توګه د نوموړي ټاکل رد کړل، له سفارته ایستل یې غیرفانوني بولي.
د ایټالیا روم ښار کې د افغانستان سفارت تېره ورځ پر خپله <a href="https://bit.ly/3F3uB7y"><strong>فېسبوک</strong></a> پاڼه لیکلي و، تېره ورځ (د مرغومي ۱۴مه) د ایټالیا ــ روم کې د افغانستان اسلامي جمهوریت مخکنی کارکوونکی محمد فهیم کشاف چې مخکې یې د ا. ا. ج نظام او ارزښتونو څخه د سرغړونې له امله دنده پای ته رسېدلې وه او د دندې رسمي مکتوب یې د بهرنیو چارو وزارت او ایټالیا د نړیوالو همکاریو له خوا د دیپلوماټیک کارتونو او موټرو د پلېټونو د تسلیمۍ لپاره صادر شوی و، په «غیرقانوني» ډول له خپل کم عمره زوی سره د دغه سفارت حریم ته داخل شوی دی.
سرچینه زیاتوي، کشاف د دې تر روښانولو وروسته چې د «طالبانو د ډلې» له خوا د نوي سفیر په توګه ټاکل شوی او دې ته په پام چې مخکې هم دغه سفارت «کابل کې د طالبانو له ادارې» د هغه د دندې د دوام په تړاو مکتوبونه ترلاسه کړي و د سفارت د یوه کارکوونکي په شتون کې د افغانستان پر سفیر د فزیکي برید قصد درلود چې د سفیر له خوا یې مخه ونیول شوه.
سرچینې زیاته کړې، د افغانستان سفارت د ایټالیا جمهوریت پولیسو ته خبر ورکړی، هغوی د سفارت د حقوق پوهانو (نه د ایټالیا سفارت د پارلمان استازو) په موجودیت کې فهیم کشاف د سفارت له حریم څخه ایستلی دی.
خو د افغانستان د بهرنیو چارو وزارت ویاند عبدالقهار بلخي پر خپله <strong><a href="https://bit.ly/3pUbvfr">ټویټر</a> </strong>پاڼه لیکلي: ((د بهرنیو چارو وزارت د بشري سرچینو ریاست د دفتري اسنادو تر ملاحظې وروسته ترلاسه کړه چې محترم محمد فهیم کشاف په ٢٨/٩/١٣٩٩ نیټه د ایټالیا ــ روم کې د افغانستان سفارت د لومړي سکرتر په توګه ټاکل شوی او تر ٢٨/٩/١٤٠٢، نېټې یاد هېواد کې د افغانستان سفارت د رسمي دیپلوماټ په توګه پېژندل کېږي.))
هغه وايي، د نوموړي د دندې د پای ته رسېدو برخه کې هیڅ تصمیم نه دی نیول شوی.
بلخي زیاتوي: ((په ورته وخت کې د افغانستان اسلامي امارت له خوا ایټالیا کې د سفیر په توګه د کشاف ټاکل کېدل هم حقیقت نه لري. دا چې د دپلوماټیکو او قونسلي خدمتونو کارکوونکو د قانون مطابق یاد سفارت کې د محترم کشاف د ماموریت دوره پای ته نه ده رسېدلې، نو د دغه سفارت د مسوولینو له خوا له سفارته د نوموړي ایستل غیرقانوني او د دوی وظیفوي صلاحیت نه دی.))
