کابل (پژواک، ۱۶ مرغومی ۱۴۰۰): کابینې د رییس الوزرا د مرستیال مولوي عبدالسلام حنفي په مشرۍ یو پلاوی ټاکلی چې د بدخشان د لاجوردو او وردګو مرمر ډبرو کانونو داوطلبۍ ته د سپارلو د څرنګوالي په اړه څېړنې وکړي.
د حکومت مرستيال ویاند انعام الله سمنګاني د دغه مطلب د څرګندولو ترڅنګ وويل چې په یادو څلورو کانونو کې د ميدان وردګو ولايت د بهسودو ولسوالۍ په لومړۍ حصه کې د مرمر ډبرو لومړي او دويم بلاک، د دغه ولایت د دايميرداد ولسوالۍ د درېيم بلاک او د بدخشان ولايت په کران او منجان ولسواليو کې د لاجوردو کانونه شامل دي.
سمنګاني وايي، د کابینې غونډې له ټاکلي پلاوي غوښتي چې له هر اړخیزې ارزونې وروسته دې پایلې له مسلکي نظریاتو سره غونډې ته وړاندې کړي.
