میمنه (پژواک، ۱۹ مرغومی ۱۴۰۰): د فاریاب ولایت بلچراغ ولسوالۍ کې د «اسلامي امارت» د دوو ډلمشرانو ترمنځ وسله واله نښته کې د یوه سرګروپ په ګډون دوه کسان وژل شوي او درې نور ټپیان دي.
د فاریاب سیمه ییزې سرچینې وایي چې د دغه ولایت په بلچراغ ولسوالۍ کې د «اسلامي امارت» دوو سیمه ییزو ډلمشرانو ترمنځ د وسله والې نښتې په پایله کې د یوه سیمه ییز ارباب او یوه سرګروپ په ګډون دوه کسان وژل شوي او د مقابل لوري د ډلمشر په ګډون درې کسان ټپیان شوي دي.
د فاریاب امنیې قوماندانۍ د امنیت امر ملا حزب الله مقاتل د یادې پېښې په تاییدولو سره زیاته کړه چې دغه نښته د انس او بلال په نومونو د دوو ډلمشرانو ترمنځ د «خواجه عرب» په سیمه کې شوې چې په پایله کې یې انس وژل شوی دی.
مقاتل زیاته کړه، د ولسوالۍ مرکز ته د تورنو کسانو د لېږد پر مهال د انس کسانو پر کاروان برید وکړ چې په نتیجه کې یې یو ملکي کس ووژل شو او د بلال په ګډون درې کسان ټپیان شول.
هغه د یادې پېښې انګېزه اوعلت شخصي دښمني وبلله او زیاته یې کړه چې په دې اړه څېړنې پیل شوې څو اصلي قضیه معلومه شي.
په همدې حال کې یوې باوري سرچینې پژواک ته وویل چې تېره شپه د طالبانو یوه ډلمشر بلال د «قروغ» سیمې ته د خواجه عرب سیمې ډلمشر انس یوې مېلمستیا ته دعوت کړی و او وروسته یې وواژه.
سرچینې زیاته کړه: «کله چې امنیتي ځواکونو بلال او نفر یې ونیول او غوښتل یې چې د ولسوالۍ مرکز ته یې انتقال کړي، د انس کسانو پر هغوی برید وکړ چې په نتیجه یې د سیمې یو ارباب په کې ووژل شو او د بلال په ګډون درې تنه ټپیان شول.»
د سرچینې په خبره، په تېرو کلونو کې هم د یادو سرګروپانو ترمنځ شخړې کېدې چې د چارواکو په وساطت بېرته هوارېدې.
