ایبک (پژواک، ۲۸ مرغومی ۱۴۰۰): د سمنګان ولایت د ډبرو سکرو کان رياست مسوولين وايي چې په تېرو دوو مياشتو کې يې له دې ادارې ٩٤٥ ميليونه او ٢٩٠زره افغانۍ عوايد راټول کړي دي.
د سمنګان د کانونو رياست يوه مسوول شمس الدين حقبين وويل، دوی دغه پيسې د روان کال د لړم له ٢٨مې د مرغومي تر ٢٧مې د دره صوف بالا ولسوالۍ د ډبرو سکرو د پلور له درکه ترلاسه کړې او «د افغانستان بانک» ته يې سپارلې دي.
نوموړي د ډبرو سکرو د عوايدو ډېروالي لامل، په هېواد کې وروستي بدلونونه، د مواصلاتي لارو د امنيت ټینګښت، د ډبرو سکرو د قاچاق مخنيوى او په بازار کې ذغاللو ته د تقاضا ډېروالی بولي.
هغه وويل، د نظام له بدلون وروسته د ډبرو سکرو د کانونو عوايد د نوو دولتي چارواکو له لوري په نغدي ډول راټول او په مرکز کې مالي کمېسيون ته لېږدول کېدل.
خو د روان کال د لړم په ۲۸مه د کانونو او پټرولیم وزارت د یوه رسمي مکتوب په ترڅ کې د سمنګان ولایت د کانونو ریاست ته لارښوونه وکړه چې د ډبر سکرو عوایدو د ډاډمنې ټولېدنې لپاره دې د مکتوب له صادرولو وروسته د ډبرو سکرو عواید د بانک له لارې طی مراحل کړي او د دولت د وارداتو حسابونو ته ولېږدول شي.
هغه زياته کړه، د ډبرو سکرو د عوايدو راټولولو لپاره دا مهال دوه لویې تلې موجودې دي چې يوه يې د دهانه تور د ډبرو سکرو او بله يې د شباشک د ډبرو سکرو په کان کې نصب شوې ده. هغه موټر چې د ډبرو سکاره لېږدوي، د خپلو تعرفو په لاس کې درلودلو له مخې وزن کېږي او د ډبرو سکرو د هر ټن په بدل کې ۲۲۰۰ افغانۍ محصول ورنه اخیستل کېږي.
د سمنګان د کانونو رييس مولوي عبدالمطلب سېلاب پژواک خبري اژانس ته وويل، کله چې د زمري مياشتې په وروستيو کې د هېواد نظان بدل شو، دوى د روان کال په وږي، تلې او لړم میاشتو کې د ډبرو سکرو عواید په نغدي ډول راټولول.
نوموړي زياته کړه، اوس مهال د سمنګان دره صوف ولسوالۍ د ډبرو سکرو په کان کې شاوخوا درې زره شخصي استخراجي تونلونه فعال دي، چې په دغو تونلونو کې د بېلابېلو ولايتونو له ١٥زرو ډېر کارکوونکي په کار بوخت دي.
