د مخابراتو وزارت: روان کال کې د نوري فایبر پروژه بېرته پیليږي

کابل (پژواک، ۲ سلواغه ۱۴۰۰ ): د مخابراتو او معلوماتي ټکنالوجۍ وزارت مسوولین وایي چې د روان میلادي کال په اوږدو کې به د نوري فایبر د کیبل غځولو پروژه له سره بېرته پيل شي.

په افغانستان کې د نوري فایبر د مزو غځولو پروژه شاوخوا ١٤ کاله مخکې پیل شوې وه، خو په هېواد کې د وروستي بدلون امله يې چارې ودرېدې.

په دې اړه د مخابراتو او معلوماتي ټکنالوجۍ وزارت ویاند عنایت الله الکوزي د سلواغې په دويمه پژواک خبري اژانس ته وويل چې دغه پروژه به د افغانستان په ټولو برخو کې پلې شي چې په نتیجه کې به هېوادوال د لوړ کیفیت او ښه سرعت انټرنېټ ته لاسرسى پيدا کړي.

نوموړي وویل چې افغان ټلیکام دولتي مخابراتي شبکه په پام کې لري چې د روان میلادي کال په جریان کې د نوري فایبر د کېبل غځولو پروژه يو ځل بيا له سره پيل کړي.

همدارنګه هغه وویل، د دغې پروژې په بشپړېدو سره به هېوادوال وکولاى شي چې له کوم خنډ او ځنډ پرته خپلې اړوندې چارې پر مخ يوسي.

د يادونې ده چې په هېواد کې د پرله پسې ٢٠ کلونو جګړې له امله دا مهال هم ډېرى هېوادوال انټرنيټي او مخابراتي خدمتونو ته په سمه توګه لاسرسى نه لري.