بغلان کې د واورې له امله د دوو ولسواليو تړل شوې لار بېرته پرانيستل شوه

پلخمري (پژواک، ۶ سلواغه ۱۴۰۰): د بغلان د ټولګټو رياست مسوولین وايي چې د خوست او فرنګ او ګذرګاه نور ولسواليو لويه لار چې د وروستيو واورو له امله تړل شوې وه، بېګا د ټرافيکو پر مخ بېرته پرانيستل شوه.

د بغلان د ټولګټو  رييس ملا عباس اخند پژواک ته وويل چې دغه لاره د نهرین او خوست ولسوالۍ ترمنځ د پلفي کوتل په سیمه کې تړل شوې وه چې پرون بېرته خلاصه شوه.

ګذرکاه نور خوست او فرهنګ د بغلان ولایت دوه غرنۍ ولسوالۍ دي چې لاره يې سخته ده او په ژمي کې د پلفي او سچي کوتلونو په سیمو کې بندېږي.

د يادونې ده، د وروستيو اورښتونو له امله د هېواد د بېلابېلو ولايتونو او ولسوالیو لارې سختې شوې او ځينې لارې وخت ناوخت د لنډ وخت لپاره بندې وي.