د خوست خلک د مخابراتي شبکو د خدمتونو له ټيټ کيفيته شکايت کوي

خوست ښار (پژواک، ۱۷ سلواغه ۱۴۰۰): د خوست د لرو پرتو او د مرکز ځینو سیمو اوسېدونکي شکایت کوي چې په دې وروستیو کې د مخابراتي شبکو انټرنېټي او ټیلېفوني خدمتونه بې کیفیته شوي دي.

په دغو سيمو کې د مرکز د ځينو سيمو ترڅنګ سپېره، ځاځي میدان، باک، نادرشاه کوټ، موسې خېل او قلندر ولسوالۍ شاملې دي.

د نادرشاه کوټ ولسوالۍ يوه اوسېدونکي شاميرخان پژواک خبري اژانس ته وويل چې له څه مودې راهيسې د دې ولسوالۍ اوسېدونکي د مخابراتي شبکو له بې کيفيته خدمتونو ډېر ځورېږي او له ګڼو ستونزو سره مخ دي.

دی وايي: ((د خوست ولايت په زياتره سيمو کې انټرنېټ په دې وروستيو کې ډېر خراب شوی او هغسې کار نه کوي، څرنګه چې د خلکو ضرورت وي.))

په همدې حال کې د ارين شکيب په نوم د مرکز د لکڼو اوسېدونکي هم پژواک ته وويل، هر وخت چې دوی له چا سره ټيلېفوني اړيکه نيسي، نو د غږ د خرابوالي له امله ډېر په ستونزه کې وي.

هغه په خپلو خبرو کې له مسوولو ادارو غوښتنه وکړه چې دې ستونزې ته ژر تر ژره د حل يوه لار ولټوي.

هغه زياتوي: ((په وروستيو کې موږ د انټرنېټ له ستونزې سره ډېر مخ شوي يو؛ ځکه دا څه وخت هم له اړيکو سره ستونزه کې يو چې موږ چا سره اړيکه ونيسو. په انټرنېټ حتی يو عکس يا يو پيغام چا ته نه شو لېږلی.))

د معلوماتو له مخې، افغان ټيلي کام، افغان بېسيم، اېم ټي اېن، روشن او اتصالات هغه پنځه مخابراتي شبکې دي چې په دغه ولايت کې فعاليت کوي.

د خوست د اطلاعاتو او فرهنګ رييس شبيراحمد عثماني پژواک ته وويل چې دوی د مخابراتي شبکو له مسوولينو بيا بيا غوښتي چې د کيفيت له پلوه خپل خدمتونه پياوړي کړي او ستونزې له منځه يوسي.

هغه وويل که د مخابراتي شبکو مسوولين ژر تر ژره د خلکو غوښتنو ته مثبت ځواب ونه وايي، نو دوی به پر بديلو لارو چارو غور وکړي.

نوموړی زياتوي، تر ډېره بریده یاده ستونزه د افغان ټيلي کام اړوند د سلام په مخابراتي شبکه کې رامنځته شوې چې د دې شبکې په تخنیکي برخو کې ځینو داسې پرزو ته اړتیا ده چې په افغانستان کې نشته او له نورو هېوادونو باید را واردې شي.

هغه وايي: ((ځينې تخنيکي ستونزې شته چې هغه تخنیک په نورو هېوادونو پورې تړلی دی، شايد ځينې پرزې، ځيني سامان الات، هغه تر اوسه پورې نه وي رارسېدلي، کله چې هغه پوره را ورسېږي، ان شاالله تعالی دا نيمګړتيا به له منځه لاړه شي.))

د ځينو معلوماتو له مخې چې پژواک ترلاسه کړي، په وروستيو مياشتو کې د خوست په بېلابېلو سيمو کې د سلام مخابراتي شبکې ١٣ انتنونه په مطلق ډول فعاليت نه کوي او د دې شبکې اته نور انتنونه د شپې له خوا د برېښنا د نشتون له امله غیر فعال وي.