خوست کې لسګونه کيلوګرامه نشه يي توکي نيول شوي

خوست ښار (پژواک، ۳۰ سلواغه ۱۴۰۰): د خوست امنيه قومانداني د نشه يي توکو پرضد د مبارزې مدیریت په دغه ولايت کې د لسګونه کیلو ګرامه نشه یي توکو د نيولو خبر ورکوي.

د دغې ادارې مشر مولوي مير صادق خان نن د «سلواغې ۳۰مه» د يوه خبري کنفرانس پرمهال وویل چې ياد نشه يي توکي د تېرو لسو ورځو په جريان کې د خوست په مختلفو سيمو کې نیول شوي دي.

نوموړي وويل چې په دغو نشه يي توکو کې ۵۱ کیلو ګرامه چرس، ۶ کیلو ګرامه تریاک او یو کیلو شیشه شامل دي.

هغه وويل چې د يادو نشه يي توکو ترڅنګ یو عراده پيک اپ ډوله موټر او همدا ډول درې تنه د نشه يي توکو قاچاقبر هم نيول شوي دي.

مير صادق خان دغه راز زياتوي چې د نشه يي توکو په برخه کې یې هڅې جدي دي او د پلورونکو او قاچاقبرو ترڅنګ يې استعمالوونکو سره هم قانوني چلند کېږي.

ورته مهال د خوست امنیه قوماندانۍ مطبوعاتي مسوول مستغفر ګربز بیا ياد کنفرانس ته په خبرو کې د امنیت د ټينګښت په تړاو خلکو ته ډاډ ورکړ او ويې ويل چې د دوی امنيتي ځواکونو په دغه ولایت کې د امنیتي پېښو ترڅنګ د غلو، اختطاف کوونکو او ګڼو جنایي پېښو مخنیوی کړی.

نوموړي وويل، د امنیت په برخه کې خوست مېشتو ته پوره ډاډ ورکوي چې امنیتي ځواکونو د ولس د ارام لپاره شپه او ورځ پر ځان یوه کړې او هیچا ته اجازه نه ورکوي چې ناقانونه کړنې ترسره کړي.