کندهار (پژواک، ۷ کب ۱۴۰۰): د کندهار محبس مسوول وايي، د دغه محبس ټول پخواني ملکي او نظامي کارکوونکي- چې ښځې هم په کې شاملې دي- بېرته دندو ته ورغوښتي دي.
دغه څرګندونې د محبس مسوول مولوي اخترمحمد اغا له پژواک خبري اژانس سره په مرکه کې وکړې.
هغه زیاته کړه، د محبس ټول ۱۵ ملکي او نظامي کارکوونکي چې ۸ یې ښځې دي، بېرته خپلو دندو ته غوښتل شوي او له راتلو سره یې د محبس چارې ډېرې منظمې شوې دي.
ده وویل: ((مخکې د محبس ټول اداري سیسټم ګډ وډ و، د دې لپاره چې دا چارې منظمې پر مخ ولاړې شي، د محبس پخواني کارکوونکي مې را وغوښتل، له هغو سره مې مجلس وکړ او ومې هڅول چې بېرته خپلو دندو ته راشي.))
دی وايي، د هغوی له راتګ سره کارونه منظم شوي، دغه راز د ښځو کارکوونکو راتګ ډېره مرسته کړې څو د ښځو بلاک چارې تر پخوا منظمې شي.
د محبس کارکوونکي وايي، خوشحاله دي چې بېرته خپلو دندو ته راګرځېدلي دي.
بشیر چې له تېرو شاوخو څلورو کلونو راهیسې په محبس کې دنده ترسره کوي، وایي، د محبس د نوي مسوول په راتګ سره ټول مامورین خپلو دندو ته غوښتل شوي او پرته له کوم قید او شرطه خپلې دندې مخې ته وړي.
هغه پژواک ته وویل، اوس مهال د محبس د اداري مرستیال په توګه دنده ترسره کوي او نور مامورین هم په خوښۍ خپلو دندو ته راځي.
دی وايي: ((اوس مهال ۱۵ پخواني اداري مامورین خپلو دندو ته راغلي چې اته یې ښځې کارکوونکې دي، هغوی مخکې همدلته په نظامي برخه کې دندې لرلې، اوس هم د ښځو زندانیانو د بلاک اړوند خپلې دندې مخ ته وړي.))
د ده په خبره، د نورو ادارو مامورین هم هغه چې تر اوسه خپلو دندو ته حاضر شوي نه دي، باید راشي، په لوړو معاشاتو پسې ونه ګرځي او خپلې دندې مخ ته یوسي.
هغه زیاته کړه، ستونزې به وي خو د وخت په تېرېدو سره افغانان په ګډه کولای شي ستونزې حل کړي.
زندانیان هم د محبس له مسوولینو خوښ دي او وايي، په محبس کې ښه چلند ورسره کېږي او ستونزو ته یې پر وخت ځواب ویل کېږي.
نثاراحمد چې مخکې یې نشه یی توکي کارول، له تېرو څلورنیمو میاشتو راهیسې په محبس کې زنداني دی، هغه وايي، اوس مهال په محبس کې د اته سوه زندانیانو مشري په غاړه لري او په دې پوه شوی چې
څنګه د یوه سالم انسان په توګه ژوند او نورو په نشه روږدو کسانو ته لارښوونه وکړي.
په کندهار محبس کې د ۳۳ ښځو په ګډون څه کم ۲۰۰۰ تنه زندانیان ساتل کېږي چې ډېر یې معتادین دي.
