پارون (پژواک، ۲۲ کب ۱۴۰۰): د نورستان د معلوماتي ټکنالوژۍ ریاست مسوولین وايي، د دغه ولایت په ۷ ولسوالیو کې د مخابراتي شبکو د ۱۶ پایو لګول منظور شوي چې ژر به یې د لګولو کار پیل شي.
د دغه ریاست اړوند اړوند د اترا څانګې مسوول انجینر عبیدالله ساپي پژواک خبري اژانس ته وویل، دا ګام د دغه ولایت د خلکو له غوښتنې سره سم د مخابراتي ستونزو د حل په موخه اخیستل کېږي.
هغه زیاتوي، له دغه اقدام سره به د دغه ولایت ټولې ولسوالۍ د مخابراتي خدماتو او انټرنېټ تر پوښښ لاندې راشي.
دی وايي، د ۱۶ مخابراتي پایو له جملې به درې- درې پایې په دواب، منډول، کامدېش، برګمټال او وایګل ولسوالیو او پاتې دوه پایې به په واما او نورګرام ولسوالیو کې ولګول شي.
د ده په وینا، د دې چارې له بشپړېدو سره د دغه ولایت د ټولو ولسوالیو د اړیکو نیولو ستونزې حل شي.
د نورستان اوسېدونکي پر دې چاره خوښي ښيي او وايي، له تېرو شلو کلونو له مخابراتي خدماتو بې برخې وو او له جدي ستونزو سره مخ وو.
د دواب ولسوالۍ د ژونیا درې اوسېدونکي الله نور پژواک خبري اژانس ته وویل، پخوا به یې له خپلو دوستانو او د کورنیو له غړو سره د اړیکو نیولو په موخه په ساعتونو مزل کاوه او د مخابراتي پوښښ سیمې ته به یې ځان رسوه.
دی وايي، اوس به داستونزه حل شي او له نړۍ سره به وصل شي.
د کامدېش ولسوالۍ د بازګل درې اوسېدونکی روح الله وايي، د دوی د ولسوالۍ په هیڅ سیمه کې مخابراتي شبکې کار نه کوي، خو اوس چې دا ولسوالي تر مخابراتي پوښښ لاندې راځي د دوی لپاره لوی زېری دی.
د نورستان د مخابراتو ریاست د معلوماتو له مخې د دغه ولایت ۷۰ سلنه وګړي مخابراتي شبکو ته لاسرسی نه لري خو له دې نوي اقدام سره به ۹۰ سلنه خلک د مخابراتي شبکو له خدماتو برخه من شي.
غړيYou need to subscribe to view the full article. Please login or register a new account.
