میدان ښار (پژواک، ۲۳ وری ۱۴۰۱): د ميدان وردګو پوهنې رياست مسوولین وايي چې په دغه ولايت کې مسلکي ښوونکي کم دي او ډېری ښوونځي یې ودانۍ نه لري.
د دغه ولايت پوهنې رييس مولوي محمدګل متقي پژواک خبري اژانس ته وويل: "زموږ په ولايت کې ټول ۴۲۷ ښوونځي شتون لري چې يوازې ۲۶۳ يې ودانۍ لري، دغه راز ۴۹۷۱ ښوونکي لرو خو ۱۱۴۴ نورو ښوونکو ته اړتيا لرو."
نوموړي زياته کړه چې دا ستونزې يې د پوهنې له وزارت سره شريکې کړې، خو تر اوسه ورته رسېدنه نه ده شوې.
ده وویل چې که يادې ستونزې حل نه شي، ښايي ډېری ښوونځي د تړل کېدو له ګواښ سره مخ شي.
د سیداباد ولسوالۍ د خالد بن ولید لېسې مدیر بخت نور پژواک ته وويل چې دوی د کتابونو او قرطاسيې په برخه کې ستونزې لري.
هغه زياته کړه: "ډېری وخت ان د تباشير پر ځای له سکرو استفاده کوو."
دغه راز د يادې ولسوالۍ د شهید اسدالله د لومړني ښوونځي سرښوونکی سيد اکبر خان بيا وايي چې د دوی ښوونځی ودانۍ نه لري.
ده وويل: "شپږ کاله کېږي چې زموږ ښوونځی ودانۍ نه لري او زده کوونکي په خېمو کې درس وايي."
د چک ولسوالۍ د بي بي خديجې د نجونو لومړني ښوونځي ښوونکي یحیی وويل چې شپږو ټولګيو ته يوازې دی تدریس کوي؛ ځکه ښوونکي کم دي.
نوموړي وويل چې په ښوونځي کې ټولې شاوخوا ۱۰۰ نجونې درس وايي او دی یې يوازېنی ښوونکی دی.
هغه زياته کړه چې د پوهنې ریاست ته يې د نورو ښوونکو د استخدام وړانديزونه کړي، خو په وينا يې، تر اوسه يې چا خبره نه ده منلې.
په ميدان وردګو کې ټول ۴۲۷ ښوونځي دي چې ۱۳۷ يې لېسې، ۱۸۶ منځني ښوونځي او ۱۰۴ يې لومړني دي.
له دې ډلې ۱۳۰ ښوونځي د هلکانو، ۵۶ د نجونو او ۲۴۱ يې ګډ دي.
په یادو ښوونځیو کې ۱۶۶۵۵۵ زده کوونکو ته د ۴۹۱۷ ښوونکو له خوا درس ورکول کېږي چې د زده کوونکو له جملې يې ۱۱۷۵۴۴ هلکان او ۴۹۰۱۱ نجونې دي.
غړيYou need to subscribe to view the full article. Please login or register a new account.
