د بلخ مستوفیت له یو میلیارد افغانیو ډېر عواید ترلاسه کړي

مزارشریف (پژواک، ۲۵ وري ۱۴۰۱): د بلخ ولایت مستوفیت مسوولین وایي، د سرپرست حکومت له حاکمیت راوروسته یې له یو میلیارد افغانیو څخه ډېر عواید ترلاسه کړي دي.

د بلخ مستوفیت مالي آمر حاجي نثار احمد پژواک خبري اژانس ته وويل چې دې ادارې د نوي حکومت له راتلو وروسته یو میلیارد، ۱۴ میلیونه، ۷ سوه زره او ۷۱۹۸۷ افغانۍ عواید ترلاسه کړي.

هغه وویل، دغه عواید د مالیې وزارت له ټاکل شوي پلان څخه ډېر دي او دا یې له سوداګرو، اصنافو، ټرانسپورټ او املاکو څخه راټول کړي دي.

نوموړی وایي چې دغه اداره بلخ کې له راټول کړو عوایدو څخه د شهیدانو کورنیو، معلولینو او متقاعدینو په ګډون شاوخوا ۲۵زره کسانو ته تنخواوې ورکوي.

نثار احمد همداراز زیاتوي چې د بلخ مستوفیت ټول پخواني کارکوونکي پر خپله دنده دي او هېڅ یو یې  ګوښه شوی نه دی.

بلخوا یو شمېر سوداګر او د بلخ اوسیدونکي وایي چې مالیات د حکومت حق دی؛ خو دغه راټولیدونکي عواید دې پر پراختیايي او بیارغنیزو پروژو ولګول شي.

د بلخ يو تن سوداګر حفیظ الله ځاځی وایي، د حکومت له لوري د مالیاتو کچه د خلکو عوایدو ته په کتلو برابره ده.

هغه همدا راز وایي چې ډېری پرمختللو هېوادونو د مالیاتو پر اساس پرمختګ کړی او د افغانستان راټولیدونکي مالیات دې باید پر انکشافي پروژو ولګول شي.

محمد مرادي مزارشریف ښار کې تولیدي کارخونه لري.

هغه وایي، ګمرکي محصولات لوړ دي او هم د مالونو په ګمرکاتي برخه کې د دوی ډېری کارونه ځنډېږي، نو باید یې پر وخت ستونزو او کارونو ته رسیدګي وشي.