[restrict paid="true"]
کابل (پژواک، ۶ غویی ۱۴۰۱): د روسیې د بهرنیو چارو وزیر سرګيلاوروف وایي، هغه مهال د افغانستان سرپرست حکومت په رسمیت پېژني چې ټولګډونه وي.
د روسیې د انټرفاکس خبري اژانس د خبر له مخې، لاوروف دغه څرګندونې نن په مسکو کې د ملګرو ملتونو له سرمنشي انټوني ګوټریش سره له لیدنې وروسته د یوې خبري غونډې پر مهال کړې دي.
هغه زیاته کړې، روسیه غواړي چې د افغانستان سرپرست حکومت د یوه قانوني حکومت په توګه په رسمیت وپېژني؛ خو هغوی باید ټولګډونه حکومت جوړ کړي.
سرګي لاوروف ویلي: «موږ غواړو چې د افغانستان له نوي حکومت سره بشپړې ډیپلوماتیکې اړیکې ولرو، خو هغوی باید د ټولګډونه حکومت جوړولو په تړاو له نړیوالو سره خپلې ژمنې عملي کړي.»
د روسیې د بهرنیو چارو وزیر زیاته کړې، د افغانستان نوی سرپرست حکومت باید نه یوازې د قوم او مذهب، بلکې له سیاسي پلوه هم پراخ بنسټه حکومت جوړ کړي.
بلخوا، د افغانستان سرپرست حکومت په ځلونو ویلي چې له دوی سره د افغانستان ټول قومونه په واک کې شریک دي او ټولو ته برخه ورکړل شوې ده .
باید وویل شي چې روسیې په رسمي توګه د افغانستان سرپرست حکومت په رسمیت نه دی پېژندلی؛ خو په مسکو کې یې د افغانستان سفارت د کابل استازي ته سپارلی او ډیپلوماتان یې په رسمیت پېژندلي دي.
[/restrict]
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن