<p style="text-align: justify;">ميمنه (پژواک، ۱۴ غویی ۱۴۰۱): په فاریاب کې سیمه ییزې سرچینې وایي چې په دغه ولایت کې د وروستیو بارانونو او سېلابونو راوتلو له امله ۱۰۰۰ کورونه زیانمن، ۴ کسان مړه او ۱۰ نور ټپیان شوي دي.</p>
<p style="text-align: justify;">د فاریاب د طبيعي پېښو پروړاندې د چمتووالي ادارې امر انجنیر سید مسعود رسا پژواک خبري اژانس ته وویل چې دغه سېلابونه تېره شپه په مېمنې ښار او ولسوالیو کې راوتلي دي.</p>
<p style="text-align: justify;">نوموړي زیاته کړه: «د تر لاسه شویو راپورونو او لومړنیو شمېرو له مخې، د یادو سېلابونو له امله ۴ کسان مړه شوي، ۱۰ نو ټپیان شوي او له ۳۰۰ ډېر څاروي له منځه تللي دي.»</p>
<p style="text-align: justify;">د هغه په وینا، په مېمنه ښار او ولسوالیو کې د سېلابونو له امله له ۱۰۰۰ ډېر کورونو، سلګونه جرېبه ځمکو او باغونو ته زیان رسېدلی، ۲۰ ژرندې، استنادي دیوالونه او د اوبو کانالونه هم له منځه تللي دي.</p>
<p style="text-align: justify;">رسا وویل، په مېمنه ښار کې ۴۰۰ کورنیو ته زیان اوښتی، له اوبو څخه د یوه ۸ کلن ماشوم او بل ۳۵ کلن سړي مړي را ایستل شوي، ۵۰ څاروي له منځه تللي او سلګونه جرېبه کرنیزې ځمکې او باغونو ته زیان اوښتی دی.</p>
<p style="text-align: justify;">نوموړي دغه راز زیاته کړه، د قیصار ولسوالۍ په چهلګزي، هزاره کلا، او تګاب ايرک سیمو کې د سېلابونو راوتلو له امله ۲۰ کورونه په بشپړ ډول او ۲۰۰ کورونه څه ناڅه ویجاړ شوي، دوه کسان مړه شوي، ۱۰ ټپيان شوي او۱۰۰ جرېبه کروندې ته زيان رسېدلی دی.</p>
<p style="text-align: justify;">د هغه د معلوماتو له مخې، ۵۰۰ کورنیو ته زیان رسېدلی، سلګونه جریبه کرنیزه ځمکه ویجاړه شوې، ۲۰ ژرندې او یو شمېر څاروي له منځه تللي دي.</p>
<p style="text-align: justify;">پېښو ته د رسېدنې امر وایي، د تلفاتو او مالي زیانونو د کره شمېرې معلومولو لپاره یې د سروې له ټېم او له همکارو بنسټونو سره بیړنۍ ناسته کړې، څو په دې اړه د اوښتو زیانونو په اړه راپور وړاندې کړي.</p>
<p style="text-align: justify;">هغه زیاته کړه چې له سروې وروسته به له زیانمنو سره ژر تره ژره د خوراکي توکو، خېمو او جامو مرسته وشي.</p>
<p style="text-align: justify;">نوموړي دغه راز وويل چې نن له غرمې وروسته به ولايتي مشرتابه د حالاتو د کمېټې غونډه کوي او اړمنو ته د مرستو د رسولو په اړه به پرېکړه وکړي.</p>
<p style="text-align: justify;">د کوهستان بندر یو مخور مظلوميار وايي، له يو نيم ساعت سخت باران وروسته د خلکو کروندو، باغونو او څاریو ته درانه زیانونه اوښتي دي.</p>
<p style="text-align: justify;">هغه وویل، هغه ناسته چې نن د قومي مشرانو په حضور کې ترسره شوه، کروندو او باغونو ته د زيان اوښتو سربېره د ٢٠ غواګانو او ٢٥٠ څارويو د له منځه تلو راپور برابر او له اړوندو ادارو سره شريک شو.</p>
<p style="text-align: justify;">د مېمنې ښار اوسېدونکى پيرمحمد چې نانوایي لري، وايي چې شپې دوه بجې یې کور ته ناڅاپه اوبه راغلې، اولادونه یې ورسره واخیستل او وتښتېد او ټول شته یې تر اوبو لاندې پاتې شول.</p>
<p style="text-align: justify;">هغه زياته کړه: «۱۰ بورۍ نسیه اوړه مې راوړي وو او هره ورځ به مې په کور کې ډوډۍ پخوله، د ډوډۍ له خرڅولو وروسته به مې د اوړه پلورونکي پیسې ورکولې، خو د کورنۍ ټول اوړه او خوراکي توکي مې تر خاورو او خټو لاندې شول.»</p>
