[restrict paid="true"]
<p style="text-align: justify;">ترینکوټ-ښرنه (پژواک، ۱۸ غویی ۱۴۰۱): په اروزګان او پکتيکا ولايتونو کې د تېر کوچني اختر په مناسبت د پهلوانۍ او نېزه بازۍ پيل شوې سيالۍ پاى ته ورسېدې.</p>
<p style="text-align: justify;">د اروزګان د پهلوانۍ په سياليو کې د دغه ولايت د مرکز او ولسوليو ترڅنګ، د کندهار ولایت د نېش، سپین بولدک، میانشین او له زابل ولایت څخه ۲۲۰ پهلوانانو ګډون کړی و.</p>
<p style="text-align: justify;">د اروزګان ولایت د ورزش او بدني روزنې امر قدرت الله الفت وویل چې دغه پنځه ورځنۍ سيالۍ د خاص اروزګان ولسوالۍ په اتلولۍ سره پاى ته ورسېدې.</p>
<p style="text-align: justify;">الفت وایي، همداسې په ترتيب سره د کندهار د شاولیکوټ ولسوالۍ پهلوانانو دويم مقام او د اروزګان د چورې ولسوالۍ غېږنیونکو درېیم ځاى خپل کړ.</p>
<p style="text-align: justify;">دغه راز د اروزګان د اطلاعاتو او کلتور ریيس محمد اصف وایي، په پام کې ده چې په راتلونکي کې هم ورته سيالۍ ترسره شي.</p>
<p style="text-align: justify;">همدارنګه يوه پهلوان داوود پژواک اژانس ته وويل چې مسوولين بايد د هېواد په کچه د ورته سياليو ترسره کولو لپاره زمينه برابره کړي.</p>
<p style="text-align: justify;">دغه راز د يو بل خبر له مخې، په پکتيکا ولایت کې د نېزه بازۍ سيالۍ پاى ته ورسېدې.</p>
<p style="text-align: justify;">د پکتيکا د المپيک امريت ورزشي مدير امين جان پژواک ته وويل چې د نېزه بازۍ دغه سيالۍ د کوچني اختر په مناسبت د درېيو کلپونو ترمنځ پيل شوې وې.</p>
<p style="text-align: justify;">هغه وايي، په دې سياليو کې ٣٠ لوبغاړو ګډون کړى و چې د اتفاق لوبډلې اتلولي ترلاسه کړه.</p>
<p style="text-align: justify;">د شوکت په نامه يوه لوبغاړي پژواک ته وويل چې په راتلونکي کې هم بايد د ورته سياليو ترسره کېدو لپاره زمينه برابره شي.</p>
<p style="text-align: justify;">[/restrict]</p>
