[restrict paid="true"]
کلات (پژواک، د غبرګولي لومړۍ نېټه ۱۴۰۱): د زابل ولایت د عامې روغتیا ریاست وايي، په شاجوی ولسوالۍ کې لسګونه نور کسان کولرا ته په ورته ناروغۍ اخته شوي چې د درملنې لپاره یې روغتیايي ډلې سیمې ته استول شوې دي.
د عامې روغتیا رییس ډاکټر عبدالحکیم حکیمي پژواک خبري اژانس ته وویل، له تېرې ورځې راهیسې د شاجوی ولسوالۍ په کوچیانو باوړیو، مانده، موسی زي، برج او ابراهیم خېلو کلیو کې تر ۱۰۰ ډېر کلیوال کولرا ته په ورته ناروغۍ اخته شوي دي.
ده زیاته کړه، دغه ناروغان چې ماشومان او ښځې هم په کې شامل دي د شدید اسهال، زړه بدوالي او تبې نښې لري.
هغه وايي، هم مهاله یې دغو سیمو ته روغتیايي ډلې لېږلې، د ځینو ناروغانو درملنه یې هملته کړې او ځینې نور یې روغتونونو ته لېږدولي دي.
د حکیمي په خبره، دا ناروغي د ناپاکو اوبو له څښلو پیدا شوې چې د مخنیوي په موخه یې شاجوی ولسوالۍ په یوولسو کلیو کې خلکو ته عامه پوهاوی هم ورکړی دی.
دغه راز نوموړي یادونه وکړه چې د ملګرو ملتونو د ماشومانو د ملاتړ صندوق/UNICEF په مرسته یې د دغو سیمو پر ۲۵۰ کورنیو کلورین او صابون وېشلي چې هرې کورنۍ ته ۲۱ پاکټه کلورین او ۱۴ چکۍ صابون ورکول شوي دي.
د عامې روغتیا رییس دا هم وویل چې د یادې ولسوالۍ په شیخال کلي کې درې ورځې مخکې هم شاوخوا ۲۵۰ کسان پر دې ناروغۍ اخته شوي وو چې د دوی د روغتیايي ډلو له خوا یې په وخت درملنه وشوه او اوس هلته دا ناروغي مهار شوې ده.
روغتیاپالان وايي، کولرا ناروغي د حفظ الصحې نه مراعتولو، ناپاکو اوبو او خوراک څخه پيدا کېږي چې په ککړ چاپېریال کې خورا په چټکۍ سره خپرېږي.
د زابل ولایتي روغتون امر متخصص ډاکټر محمد داوود مجیدي پژواک اژانس ته وویل، د دغې ناروغۍ د مخنيوي په موخه باید په څاګانو کې کلورین واچول شي او خلک پاکوالی مراعات کړي.
دی وايي، دا ناروغي د شدید اسهال، زړه بدوالي او تبې نښې لري، که په وخت یې درملنه و نه شي نو انسان د مرګ تر پولې رسوي.
خو هغه یادونه کوي چې د مالګې او Dehydration/په بدن کې د اوبو پوره کولو له لارې د دغې ناروغۍ درملنه اسانه ده.
نوموړي دغه راز ټینګار وکړ چې د دې ناروغۍ د مخنیوي لپاره اړینه ده چې خلک د څښاک پاکو اوبو او تشنابونو ته لاسرسی ولري او د ککړو اوبو ایستلو لپاره اقدامات وکړي.
د شاجوی ولسوالۍ یوه اوسېدونکي محمد سلیم چې په خپله پر دې ناروغۍ اخته شوی، پژواک ته وویل: «شدیده تبه مې وه، غوږونه مې بند وو، شدید اسهال او خواګرځی مې درلود چې ډاکټرانو مې پر وخت علاج وکړ.»
دی وايي، په کلي کې یې پاکې اوبه نشته او له همدې امله خلک پر دې ناروغۍ اخته شول.
نوموړی هیله لري چې حکومت او مرستندویه ادارې دې د دې ولسوالۍ اوسېدونکو ته د څښاک پاکو اوبو رسولو زمینه برابره کړي څو له دغه راز ناروغیو وژغول شي.
[/restrict]
