لغمان کې زرګونه هندي رېکشاوو ته اسناد ورکول کېږي

<p style="text-align: justify;">مهترلام (پژواک، ۱۰ غبرګولی ۱۴۰۱): د لغمان د ترافيکو مدیريت وايي، په دغه ولايت کې به زرګونو هندي رېکشاوو ته جواز سیر او نمبر پليټونه ورکړل شي.</p>

<p style="text-align: justify;">د لغمان د ترافیکو مدیريت د معلوماتو له مخې، اوس په دغه ولایت کې شاوخوا ۱۰زره هندي رېکشاوې شته چې اسناد نه لري.</p>

<p style="text-align: justify;">د یاد ولایت د ترافیکو مدیر مولوي حبیب‌الله مبارز پژواک خبري اژانس ته وویل چې دوی پرون د لغمان له والي او امنیې قوماندان سره په همغږۍ پرېکړه وکړه چې ټولو هندي رېکشاوو ته به قانوني اسناد ورکړي.</p>

<p style="text-align: justify;">مبارز زیاتوي، د یادو رېکشاوو چلوونکو ته ۱۵ ورځې وخت ورکړل شوی چې خپل جواز سیر او  نمبر پليټ ترلاسه کړي.</p>

<p style="text-align: justify;">ده وویل: «هغه رېکشا چلوونکي چې د جواز سیر او پلیټ له اخیستو سرغړونه وکړي، د ترافیکو د قانون مطابق به سزا ورکړل شي.»</p>

<p style="text-align: justify;">مولوي مبارز زياته کړه چې پر جواز سیر او پليټ باندې شاوخوا ۱۶زره افغانۍ لګښت راځي چې له قانون سره سم  به د دولت په خزانه کې راټولې شي.</p>

<p style="text-align: justify;">نوموړي وويل، د دغو اسنادو وېشلو سره به له يوې خوا د دولت عوايد زيات شي او له بلې خوا به د جنايي جرمونو مخه ونيول شي.</p>

<p style="text-align: justify;">محمد طاووس صافی چې په مهترلام ښار کې هندي رېکشا چلوي، پژواک ته وویل: «د دولت دغه اقدام د ستایلو دی، ځکه موږ د مجبورۍ له مخې رېکشه اخيستې او خپلو بچيانو ته يوه مړۍ حلاله روزي پيدا کوو.»</p>