کندهار (پژواک، ۱۱ غبرګولی ۱۴۰۱): د کندهار د کانونو او صنایعو خونې مسوولین او صنعتکاران وايي، د برېښنا ستونزې د حل په موخه دې دغه ولایت ته د وارداتي برېښنا د لېږد درېدلې چارې بېرته پیل شي.
هغوی دا څرګندونې د افغانستان د برېښنا شرکت له عمومي رییس ملا محمد عیسی اخند سره کندهار ته د هغه د سفر په ترڅ کې په یوه ناسته کې کړې دي.
د کندهار د کانونو او صنایعو خونې رییس سید سرور اماني په دې ناسته کې وویل، په کندهار کې شته برېښنا د کندهار د اوسېدونکو او صنعتي پارک لپاره بسنه نه کوي او هر ځل پرې کېدل او نښلول یې فابریکو ته زیانونه اړوي.
هغه زیاته کړه، په کندهار کې ډېرې فابریکې د برېښنا د کمښت له امله یا بندې شوې او یا هم هرات او کابل ته لېږدول شوې دي.
دی وایي: «د کندهار برېښنا اساسي رغونې ته اړتیا لري، اوسنۍ برېښنا چې ډېره یې د کجکي له بنده تامینېږي، د اوبو کچې له ټيټېدو سره وخت ناوخت بندېږي؛ په کار ده کندهار ته د وارداتي برېښنا د لېږد چارې- چې ډېره برخه یې بشپړه شوې- بېرته پیل شي.»
دغه راز صنعت کارانو وویل چې د کجکي برېښنا هر ځل پرې کېدل او نښلول فابریکو ته زیان اړوي؛ ځکه دغه برېښنا له کندهار ښاره تېره او بیا صنعتي پارک ته ورکول شوې ده.
هغوی غوښتنه وکړه چې د کندهار صنعتي پارک ته دې د کجکي برېښا له پاور پلانټ څخه ځانګړي مزي وغځول شي څو په دې توګه د فابریکو مشینریو ته د زیان مخنیوی وشي.
د کندهار د کانونو او صنایعو خونې اجرائیوي مدیر احمدالله عزیزي هم وویل، صنعتکارانو ته باید د برېښا ترڅنګ په نورو برخو کې هم اسانتیاوې برابرې شي څو دلته نورې پانګونې ته هم زمینه برابره شي.
د برېښنا شرکت عمومي رییس ملا محمد عیسي اخند په خپلو خبرو کې وویل، د هلمند له کجکي بنده تر کندهار ښار پورې د برېښنا مزیو نوي کولو چارې په چټکۍ روانې دي چې په نږدې موده کې به بشپړې شي.
ده زیاته کړه، پر دې پروژې ۳۰۰ میلیونه افغانۍ لګښت راځي چې د برېښنا شرکت له خوا ورکول کېږي.
دی وايي، د دغه نوي لین چارې د کندهار تر میوند ولسوالۍ بشپړې شوې او پاتې کار يې په چټکۍ روان دی چې په نږدې ورځو کې به بشپړ او برېښنا به وصل شي.
هغه د وارداتي برېښنا په اړه وویل، دا چاره ډېرې بودجې ته اړتیا لري او په دې اړه یې لوړ پوړو مسوولینو ته وړاندیزونه کړي دي.
دی وايي: «د کندهار برېښنا پر دایمي حل کار کوو؛ وارداتي برېښنا زیاتې پانګونې او بودجې ته اړتیا لري، شيخ صاحب ته مو وړاندیزونه کړي، هغه ویلي چې هر څوک کولای شي د برېښنا د تولید په برخه کې پانګونه وکړي، برېښنا شرکت ورسره همکار دی.»
هغه دغه راز غوښتنه وکړه چې صنعتکاران دې د برېښنا بېلونه پر وخت تحویل کړي او دوی هم ژمن دي د برېښنا د وېش په برخه کې صنعتکارانو ته لومړیتوب ورکړي.
له تېرو دوو اوونیو راهیسې له کجکي بند څخه کندهار ته د برېښنا جریان پرې شوی چې لامل یې د نوو مزیو غځول ګڼل کېږي.
