د پنجشېر مستوفیت په تېرو شپږو میاشتو کې ۸۵ میلیون افغانۍ عواید راټول کړي

پاراخ (پژواک، ۱۴ غبرګولی ۱۴۰۱): د پنجشېر ولایت د مستوفیت مسوولین وایي، په تېرو شپږو میاشتو کې یې ۸۵ میلیون افغانۍ عواید راټول کړي دي.

هغوی زیاتوي چې د تېرو کلونو په پرتله د یاد ولایت د مستوفیت په عوایدو کې د پام وړ ډېروالی راغلی دی.

د پنجشېر د مستوفیت رییس مولانا ګل‌احمد حنفي پژواک ته وویل، دې ادارې په وروستیو شپږو میاشتو کې ۸۵ میلیون افغانۍ عواید ترلاسه کړي چې د تېرو کلونو په پرتله د پام وړ ډېروالی ښيي.

نوموړي د عوایدو ډېرېدو لامل د فساد نشتوالی او روڼتیا په ګوته کړل خو د ډېرېدو مشخصه شمېره یې ونه ښوده.

هغه وویل، دغه ۸۵ میلیون افغانۍ د مرغومي، سلواغې، کب، وري، غویي او د غبرګولي میاشتوعواید دي چې یادې ادارې راټول کړي دي.

هغه زیاته کړه: «راټول شوي عواید د یاد ولایت له مالیاتي او غیرمالیاتي سرچینو لاس ته راغلي او د عوایدو د ډېرېدو لامل د عایداتو په راټولولو کې رښتینولي او د فساد مخنیوی بولي.»

د پنجشېر مستوفي که څه هم دغه ولایت د هېواد د نورو ولایتونو په پرتله عایداتي نه بولي خو وروستیو لاس ته راغلو عوایدو ته هیله‌من دی.

په دغه ولایت کې ځيني اقتصاد‌پوهان د یاد ولایت د مستوفیت له خوا د عوایدو راټولولو او رسولو کار ستایي او له حکومته غواړي، څو د عوایدو راټولولو په برخه کې ډېر کار وکړي.

د اقتصاد يوه کارپوه شمس‌الحق پژواک ته وویل: «له کورنیو سرچینو راټول شوي عواید د خلکو لپاره بسنه نه کوي، حکومت باید اوږدمهال زیربنایي او عایداتي کارونه وکړي، دغه لړۍ د ټولنې د هوساینې په برخه کې ډېره مرسته کوي.»

د عنابې ولسوالۍ اوسېدونکی او دوکاندار رحیم الله د عوایدو راټولولو په برخه کې د حکومت له کاره خوښ دی او له دوکاندارانو یي وغوښتل څو خپل مالیات پر خپل وخت ورکړي.

د یادونې ده، په هېواد کې د نوي حکومت په راتلو سره دا لومړی ځل دی چې د پنجشېر سیمه‌ییز مسوولین په دغه ولایت کې د عوایدو له راټولېدو خبر ورکوي.