جلال اباد (پژواک، ۲۳ غبرګولی ۱۴۰۱): له نورستان، کونړ او خوست وروسته د ننګرهار په هسکه مېنه ولسوالۍ کې هم په يوه ځنګله کې اور لګېدلی خو ځايي خلکو او چارواکو يې د مهارولو هڅې پيل کړې دي.
چارواکي وايي، اور نن د دې ولسوالۍ د اوغز تنګي په درشلو ناو سيمه کې لګېدلی دی.
د ننګرهار د اطلاعاتو او کلتور رياست د رسنيو برخې مسوول قريشي بدلون پژواک خبري اژانس ته وويل چې نن د دغه ولايت د هسکې مېنې ولسوالۍ د اوغز سيمې ځنګله کې اور لګېدلی دی.
دی وايي، ځايي چارواکو د قومي خلکو په همکارۍ د اور مهارولو هڅې پيل کړې او هيله من دي چې ژر مهار شي.
د نوموړي د معلوماتو له مخې، تېره ورځ هم د دې سيمې په یوه بل ځنګله کې اور لګېدلی و خو هغه هم د قومي خلکو په همکارۍ مهار شوی دی.
د سيمې يوه اوسېدونکي شينګل شينواري پژواک ته وويل، اور ډېر پراخ شوی نه دی او هيله مندي ډېر ده چې ژر مهار شي.
له دې مخکې د نورستان، کونړ او خوست په ځنګلونو کې هم اور لګېدلی و خو د خوست اورلګېدنه د ځايي خلکو له خوا تر نورو ژر کنټرول شوه.
Visits: 45
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن