مېمنه (پژواک، ۲۴ غبرګولی ۱۴۰۱): د فاریاب ولایت سیمهییز مسوولان په قیصار ولسوالۍ کې د ۱۸ کیلومتره سړک د جغل اچونې او ترمیم چارې د پيلېدو خبر ورکوي، زیاتوي چې د دغې پروژې په بشپړېدو سره به د ۸۰ کلیو د مواصلاتي لارو ستونزې هوارې شي.
د قیصار ولسوال ملا محمداسماعیل سعادت پژواک خبري اژانس ته وویل، دغه سړک د قیصار ولسوالي له شاخ سیمې سره - چې د فاریاب له مشهورو بازارونو دی - نښلوي.
هغه زیاته کړه، دغه ۸۲ کلي شاوخوا ۱۵۰زره اوسېدونکي لري او د لارو د خرابوالي له امله له ګڼو ستونزو سره مخ وو چې ځيني وختونه ناروغان او امیدوارې مېرمنې د زېږون په وخت د ولایت او ولسوالۍ مرکز ته د لېږد پر مهال، د لارې په اوږدو کې تلف کېدل.
نوموړي وویل، د دغه سړک په ترمیمولو او جغل اچونې سره به د یادو کلیو پر اوسېدونکو سربېره، د بادغیس ولایت د غورماچ او جوند ولسوالیو خلک هم په اسانۍ سره تګ راتګ وکړي.
د قیصار ولسوال له حکومته وغوښتل چې د یاد سړک پخول دې په پراختیایي پروګرامونو کې شامل کړي.
د فاریاب د کرنې او مالدارۍ ریاست د کرنیزو چارو مرستیال مولوي نورالهدا متوکل وایي، د قیصار سړک چې ۱۸ کیلومتره اوږدوالی لري، د ترمیم او جغل اچونې لګښت یې نږدې څلور میلیونه افغانۍ اټکل شوې چې د کرنې وزارت له خوا ورکول کېږي.
متوکل وویل چې د یوه کیلومتر سړک د ترمیم او جغل اچونې تړون له یوه شرکت سره په ۱۸۰زره افغانیو شوی دی.
د سیمې ځينو اوسېدونکو د قیصار ولسوالۍ له مرکزه سره د شاخ سیمې د مواصلاتي لارې د ترمیم او جغل اچونې د کار له پیلېدو خوښي وښوده.
د سیمې یوه قومي مشر حاجي عبدالوهاب د کرنې وزارت او د فاریاب له مسوولینو د مننې ترڅنګ وویل چې مخکني حکومت د نړۍ له میلیاردونو ډالرو مرستو سره سره د خلکو غوښتنو ته پام نه و کړ .
هغه د یادې پروژې پيلېدل په یوه نېک پال نیولی او هیله يې وښوده چې داسې پروژې دې ډېرې شي.
په ورته وخت کې، د سیمې یو بل قومي مشر حاجي عبدالکریم کوهي هم د یادې پروژې له پیلېدو مننه وکړه او ویې ویل: «اوسنی حکومت ۱۸ کیلو متره سړک له څلورو میلیونو افغانیو په کم لګښت رغوي؛ خو که د جمهوریت حکومت وای، ښایي د دې سړک مصرف یې څلوېښت میلیونه افغانۍ اټکل کړی وای او ۹۰ سلنه پیسې به یې حیف و میل کړې وای او کار به یې هم نه وای بشپړ کړی.»
هغه له نړیوالو موسسو غوښتنه وکړه چې د بیارغونې په برخه کې دې خپلو مرستو ته ادامه ورکړي او زیاته یې کړه چې اوس د بیارغونې پروګرامونو د پلي کولو لپاره امنیت ټینګ دی.
