په وروستیو لسو میاشتو کې د کندوز مستوفیت عواید ۱۱ سلنه ډېر شوي

[restrict paid=”true”]

کندوز ښار (پژواک، ۲۵ غبرګولی ۱۴۰۱): د کندوز سیمه‌ییز مسوولین وایي، په هېواد کې د نوي حکومت په راتلو سره د دغه ولایت د مستوفیت عواید د تېرو لسو میاشتو په پرتله ۱۱ سلنه زیاتوالی ښیي.

مسوولان د یادې ادارې د عوایدو ډېرېدو لامل د مالیاتو په راټولولو کې رونټیا او د پخوانیو باقیاتو لاسته راوړل یادوي.

د کندوز مستوفي ملا محمد‌نسیم له پژواک سره په خبرو کې وویل: « د اسلامي امارت په راتلو سره عوایدو کې زیاتوالی راغلی؛ مخکې له بدلونه مخکې په ۱۰ میاشتو کې ۴۳۴،۳ میلیونه افغانۍ عواید تر لاسه شوي، خو له بدلون وروسته دغه رقم ۴۸۸،۲ میلیونه افغانیو ته لوړ شوی چې توپیر یې ۵۳ میلیونه دي او ۱۱ سلنه زیاتوالی ښیي.»

نوموړی وایي، دا عواید یې په داسې حال کې لاسته راوړي چې ځینې دولتي ادارې لا هم فعالې نه دي او عواید نه لري؛ خو هغه د فساد له منځه تلل او په شفاف ډول د مالیاتو راټولول د مستوفیت ادارې د عوایدو د ډېرېدو لامل بولي.

نوموړی زیاتوي، هڅه کوي چې د نوي کال په درجه‌بندۍ کې د دغې ادارې عواید له دې هم ډېر کړي.

د هغه په خبره، د یادې ادارې راټول شوي عواید به د ملکي او نظامي کارمندانو د معاشونو اجرا لپاره بسنه وکړي.

خو له بلې خوا، ځيني مالیه ورکوونکی وایي چې په وروستیو میاشتو کې یې کاروبار ټکنی شوی او له حکومته غواړي څو ورسره د مرستې  لپاره د وضع شويو مالیاتو کچه دې کمه کړي.

د کندوز د غوړیو پلورونکو ټولنې رییس اختر محمد ابراهیم‌خېل پژواک ته وویل: «موږ شپږ اوو ځلې مالیه ورکوو، یو ځل یې ګمرک ته ورکوو، څو ځلي راڅخه مالیات اخیستل کېږي، کومه مالیه چې مخکني حکومت اخیستله باید په اوسني حکومت کې کمه شي، ځکه چې کاروبار نشته، موږ له اسلامي امارته غواړو څو مالیات راکم کړي او له موږ سره دې همکاري وکړي.»

دا په داسې حال کې ده چې د مخکني حکومت له پرځېدو وروسته، د حکومت ځينې عایداتي سرچینې فلج شوې دي؛ خو سره له دې بیا هم په راټولو شوو عوایدو کې زیاتوالی راغلی دی.

[/restrict]