<p style="text-align: justify;">اتلانتا (پژواک، ۴ چنګاښ ۱۴۰۱): د ملګرو ملتونو د ماشومانو ملاتړ صندوق (یونیسف) ويلي چې د افغانستان په پکتیکا او خوست ولایتونو کې د تېرې اونۍ زلزله کې ۱۲۱ ماشومان هم مړه شوي دي.</p>
<p style="text-align: justify;">د افغانستان لپاره د یونیسف ادارې استازي محمد اګ ایویا د چنګاښ په ۴مه ویلي چې په دغو ولایتونو کې د وروستۍ زلزلې له امله ۶۷ ماشومان ټپيان شوي هم دي چې زیات شمېر یې په روغتونونو کې تر درملنې لاندې دي.</p>
<p style="text-align: justify;">د ملګرو متلونو د وروستي راپور پر اساس، په افغانستان کې د تېرې چهارشنبې شپې زلزلې له امله تر دې مهاله ۱۰۳۲ کسان مړه شوي او ۱۶۴۳ نور ټپیان شوي دي.<img class=" wp-image-467948 alignleft" src="https://pajhwok.com/wp-content/uploads/2022/06/FV3lVMwX0AYvzoS-283x300.jpg" alt="" width="346" height="367" /></p>
<p style="text-align: justify;">ایویا زیاته کړې چې دغه ارقام وروستي نه دي او په خبره یې، په پکتیکا او خوست ولایتونو کې د شوې زلزلې له امله د تلفاتو زیاتېدو احتمال شته.</p>
<p style="text-align: justify;">بلخوا د ماشومانو د ساتنې سازمان هم دوه ورځې مخکې ویلي وو چې د افغانستان په سوېل ختیځ کې د رامنځته شوې زلزلې له امله د زیانمن شوو ماشومانو په اړه اندېښمن دي.</p>
<p style="text-align: justify;">د دغه سازمان د افغانستان برخې مسوولې کرس نیامندي ویلي: "د ماشومانو د ساتنې اداره د هغو ۱۱۸ زره ماشومانو په اړه اندېښمنه ده چې ښايي د افغانستان په جنوب ختیځ کې د زلزلې له امله اغېزمن شوي دي... په زیات احتمال سره له دغو ماشومانو څخه زیات یې اوس مهال د څښلو اوبو، خوړو او د خوب لپاره خوندي ځای ته اتیا لري."</p>
<p style="text-align: justify;">نیامندي زیاته کړې چې ماشومان په زلزله کې تر ټولو ځپل شوې طبقه ده؛ ځکه په خبره یې زیات یې د لوږې، ټپونو او ناروغیو له امله د مرګ له خطر سره مخ دي.</p>
<p style="text-align: justify;">یونیسف ویلي چې په خوست او پکتیکا کې د زلزلې سیمو د اوبو رسولو سستم زیانمن شوی او اوسېدونکي یې د ماشومانو په ګډون د څښلو پاکو اوبو ته لاسرسی نه لري.</p>
