<p style="text-align: justify;">کلات (پژاک، ۸ چنګاښ ۱۴۰۱): چارواکي وايي، د زابل ولایت په مرکز او ولسوالیو کې د زدهکړو ۴۹۰ سیمهییز ټولګي جوړېږي چې زرګونو ماشومانو ته به په کې د زدهکړو زمینه برابره شي.</p>
<p style="text-align: justify;">د دغه ولایت د پوهنې رییس مولوي محمدعثمان حریت پژواک خبري اژانس ته وویل، دغه سیمهییز ټولګي د کډوالو لپاره د ناروې کمېټې/ NRC په مرسته په مرکز کلات او یوولس ولسوالیو کې جوړېږي.</p>
<p style="text-align: justify;">هغه زیاته کړه چې یاد ټولګي په هغو سیمو کې جوړېږي چې ماشومان یې له ښوونځیو په لرې واټن کې اوسېږي او په اسانۍ ښوونځیو ته نهشي تلای.</p>
<p style="text-align: justify;">دی وايي، په هر ټولګي کې به ۳۰ ماشومان زدهکړې کوي چې ټول شمېر یې ۱۴۷۰۰ زدهکوونکو ته رسېږي.</p>
<p style="text-align: justify;">د هغه په خبره، د دغو سیمهییزو ټولګیو لپاره ۴۹۰ ښوونکي، ۴۹ څارونکي او ۱۲ مسوولین پر دندو ګومارل کېږي.</p>
<p style="text-align: justify;">د پوهنې رییس د دې ترڅنګ خبر ورکړ چې په کلات او ولسوالیو کې به شاوخوا ۱۰۰ هغه ښوونځي هم بېرته پرانیستل شي چې په تېرو کلونو کې د جګړو او ناامنیو له امله تړلي وو.</p>
<p style="text-align: justify;">دی وايي، په دې تړاو یې له یوې بهرنۍ موسسې سره خبرې کړې او هوکړه یې کړې چې دغو ښوونځیو ته به امکانات چمتو کوي او ښوونکو ته به یې معاشونه هم ورکوي.</p>
<p style="text-align: justify;">د سیمې اوسېدونکي د پوهنې ریاست پر دغه اقدام خوښي ښيي او وايي په دې توګه به هغو زرګونو ماشومانو ته د زدهکړو زمینه برابره شي چې ښوونځي له تلو بې برخې دي.</p>
<p style="text-align: justify;">د مرکز کلات یوه اوسېدونکي عبدالحمید پژواک خبري اژانس ته وویل، په هغو سیمو کې چې ښوونځي نشته، د سیمهییزو ټولګیو جوړول ارزښتناک کار دی.</p>
<p style="text-align: justify;">دی زیاتوي، له دې لارې زرګونو له زدهکړو بې برخې ماشومانو ته د تعلیم زمینه برابرېږي.</p>
<p style="text-align: justify;">د زابل د پوهنې ریاست د معلوماتو له مخې، تېر کال په دغه ولایت کې د یونیسف ادارې په مرسته هم د زدهکړو ۳۰۰ سیمهییز ټولګي جوړ شوي چې ۹ زره زدهکوونکو ته په کې د زدهکړو زمینه برابره شوې ده.</p>
<p style="text-align: justify;">د دغه ولایت د پوهنې ریاست په تشکیل کې ټولټال ۲۲۲ ښوونځي شته چې یوازې ۹۴ یې فعال دي چې په کې څه باندې ۴۷ زره هلکان او څه باندې ۱۰ زره نجونې زدهکړې کوي.</p>
