کندهار (پژواک، ۱۴ چنګاښ ۱۴۰۱): د ترکيې د بشردوستانه مرستو بنسټ (IHH) په کندهار کې له ۱۰۰۰ یتیمانو سره د اختر د جامو، څپلیو او نغدو پیسو مرسته وکړه.
د دغه بنسټ استازي وایي، دغه مرسته یې په کندهار کې د کار او ټولنیزو چارو له ریاست سره په همغږۍ کړې ده.
د مرستو د وېش یوه مسوول مسلم غفاري پژواک خبري اژانس ته وویل، په کندهار کې ۱۰۰۰ یتیمانو ته- چې ۷۵ تنې يې نجونې وې- د اختر جامې، څپلۍ او نغدې پیسې ورکړل شوې دي.
ده زیاته کړه: «دغه زر تنه یتیمان د کار او ټولنیزو چارو ریاست له خوا راپېژندل شوی چې موږ ورته یو سیټ جامې، څپلۍ او د جامو جوړولو لپاره پنځه- پنځه سوه افغانۍ ورکړې دي.»
هغه وایي، دغه بنسټ چې له دې وړاندې یې هم له یتیمو او بې وزلو کورنیو سره د خوراکي او نورو توکو مرستې کړې نور هم خپلو مرستو ته دوام ورکوي.
پر همدې مهال د کندهار د کار او ټولنیزو چارو ریاست د روزنتونونو آمر مولوي الله نظر د ترکیې د بشردوستانه مرستو له بنسټ څخه د دغې مرستې له امله مننه وکړه، خو وایي، له یتیمانو سره دغه مرستې بسنه نه کوي.
د هغه په وینا، د کندهار په هره ولسوالۍ کې زرګونه یتیمان شته چې اکثره یې سرپرستان نه لري، نو باید ډېرو ته یې خوراکي او نورې مرستې ورسېږي.
ده زیاته کړه: «موږ په ډېرو کورونو کې له دوو څخه تر لسو یتیمان لرو، نو داسې مرستې باید د خیریه بنسټونو او موسسو له خوا زیاتې شي، خو تر هرڅه مخکې د یتیمانو اړتیا خوراکي توکو ته ده چې باید ورکړل شي.»
شاه محمد چې د یوه یتیم ماشوم نیکه دی وایي، دومره وس نه لري چې هم خپل اولادونه او هم یتیمان وساتي، نو له خیریه بنسټونو څخه غواړي چې د خوراکي توکو مرسته ورسره وکړي.
په کندهار کې بې روزګارۍ او توکو لوړې بیې د غربت کچه ډېره کړې او خلک له مسوولینو څخه غوښتنه کوي چې د بې روزګارۍ د له منځه تلو لپاره جدي اقدامات وکړي.
