کابل (پژواک، ۲۳ چنګاښ ۱۴۰۱): د کورنیو چارو وزارت وایي، یو دیني عالم سردارولي ثاقب د کابل ښار د پنځمې امنیتي حوزې اړوند په کوټېسنګي سیمه کې د نامعلومو کسانو له خوا وژل شوی دی.
د کورنیو چارو وزارت ویاند عبدالنافع ټکور د یادو څرګندونو ترڅنګ پژواک خبري اژانس ته وویل چې مولوي ثاقب تېره شپه په خپل کور کې وژل شوی دی.
ده همداراز وویل چې د نوموړي د وژنې د څېړلو په موخه یو پلاوی ټاکل شوی او له څېړنو وروسته به د یادې پېښې په اړه نور جزئیات روښانه شي.
دغهراز د نارنج باغ دارالعلوم هم پر خپله فېسبوک پاڼه د هغه د وژل کېدو پېښه تایید کړې او لیکلي یې دي چې د جنازې مراسم به یې نن (د چنګاښ ۲۳مه) لس بجې د ننګرهار مرکز جلالاباد ښار په شېرزي لوبغالي کې ترسره شي.
د راپورونو له مخې، مولوي ثاقب د ننګرهار د شېرزادو ولسوالۍ د نکړخېلو سیمې اوسېدونکی و.
نوموړی له اوږدې مودې راهیسې د جلالاباد ښار په نارنجباغ سیمه کې یوه دیني مدرسه درلوده چې ګڼ شمېر زدهکوونکي یې درلودل.
