کابل (پژواک، د زمري لومړۍ نېټه ۱۴۰۱): د اوبو او برېښنا وزارت که څه هم د اوبو له کمېدو او د وچکالۍ کچې له ډېرېدو خبر ورکوي خو وايي چې د اوبو په برخه کې پر ٣٦٥ لويو او کوچنيو پروژو کار روان دى.
دغه څرګندونې د اوبو او برېښنا وزارت سرپرست عبداللطیف منصور د زمري په لومړۍ نېټه په کابل کې یوې خبري غونډې ته وکړې.
هغه زیاته کړه چې په هېواد کې د اورښتونو د کموالي له امله وچکالي زیاته شوې او شاوخوا ۸۰ سلنه بزګران د اوبو له کمښت سره مخ دي.
خو نوموړی وایي، دوى هڅه کوي چې په هېواد د وچکالۍ مخنیوي په خاطر د اوبو لوى او کوچني بندونه جوړ کړي.
هغه زياته کړه: «په هېواد کې د اوبو په برخه کې ۱۳ غټې پروژې او شاوخوا ۳۵۲ وړې پروژې تر کار لاندې دي، په غټو پروژو کې کمال خان، پاشدان، بخش اباد، دهندره او شاه او عروس او ځينې نور بندونه شامل دي او وړو پروژو کې کانالونه او چک ډيمونه شامل دي.»
دغه راز منصور په هېواد کې د برېښنايې ستونزو په اړه وويل چې په تېر حکومت کې د برېښنا شرکت بودجه او عوايد یو شمېر نورو ادارو ته ځانګړي شوي وو نو ځکه د دغه وزارت ځینې پروژې نیمګړې پاتې دي.
هغه وويل چې پخوانى حکومت د تاجکستان، ازبکستان او ایران د برېښنا له درکه له ۳۵ میلیون ډالر زیات پوروړی و چې یوه اندازه يې ورکړل شوې او ځيني نور يې د بانکي ستونزو له امله پاتې دي.
د نوموړي د معلوماتو له مخې، په نږدې راتلونکي کې به د درې میلیونه ډالرو په ارزښت له پنجشېر څخه کابل ته د اوبو د لېږد يوه پروژه پیل شي چې په بشپړېدو سره به يې کابل ښاريان پاکو اوبو ته لاسرسى پيدا کړي.
دی وایي چې د افغانستان د اوبو او برېښنا په برخه کې د ځان بسیاینې لپاره دوى یوه طرحه جوړه کړې او د منظورۍ لپاره یې د حکومت مشرتابه ته سپارلې ده.
نوموړي زياته کړه چې د دې طرحې له مخې کوم داخلي سوداګر چې د هېواد په کانونو کې پانګونه کوي، په مقابل کې به يې د برېښنا د توليد زمينه هم برابروي.
دغه راز ده وويل چې د همدې طرحې له مخې کومې ځمکې چې له بندونو سره نږدې وي، حکومت به يې یوه برخه سوداګرو ته ورکوي او په مقابل کې به يې سوداګر پر بندونو پانګونه کوي.
دا په داسې حال کې ده چې له دې مخکې هم د ځینو ولايتونو يو شمېر کروندګرو له وچکالۍ شکايتونه کړي وو.
غړيYou need to subscribe to view the full article. Please login or register a new account.
