شبرغان (پژواک، ۱۵ زمری ۱۴۰۱): د جوزجان د عامې روغتیا ریاست وایي، د دوو اونیو په ترڅ کې د دغه ولایت په پنځو ولسوالیو کې لږ تر لږه ۱۸زره کسان پر کولرا ناروغۍ اخته شوي او له امله یې ۱۲ کسانو ژوند له لاسه ورکړی دی.
د یاد ولایت د عامې روغتیا رییس قاري عبدالغني صمیم پژواک خبري اژانس ته وویل، د یادې ناروغۍ د لا خپرېدو د مخنیوي په موخه یې ۵ روغتیايي ټیمونه - چې هر یو یې له ۷ روغتیایي کارکوونکو جوړ دی - اقچې، منګجک، مردیان، خانقاه او فیض اباد ولسوالیو ته استولي دي.
نوموړي د هوا ګرمېدل، د خلکو له خوا د چاپیریالي حفظ الصحې نه مراعاتول او له ککړو اوبو استفاده پر یادې ناروغۍ د اخته کېدو اساسي لاملونه وبلل.
د هغه په وینا، په دوو اونیو کې د دغه ولایت په ۵ ولسوالیو کې، لږ تر لږه ۱۸زره کسان پر کولرا ناروغۍ اخته شوي او ۱۲ کسانو خپل ژوند له لاسه ورکړی دی.
هغه څرګنده کړه، د «افغان کورنیو د پيوستون» دفتر د ملګرو ملتونو له ماشومانو د ملاتړ صندوق (یونیسف) په مالي مرسته پنځه ځواب ویونکي ټیمونه یې چې د روغتیایي خدمتونو د وړاندې کولو مسوولیت لري، دغو ولسوالیو ته استولي دي.
نوموړي یادونه وکړه چې دغه ټيمونه په یادو والسوالیو کې حادو پېښو ته د رسېدنې په موخه استول شوي دي.
همدارنګه سرچینې زیاته کړه چې دغه ټیمونه یادو ولسوالیو ته ځي، څو خلکو ته روغتیایي خدمتونه وړاندې کړي او ورته د دغې ناروغۍ په اړه معلومات ورکړي.
د افغان کورنیو د پيوستون (صف) ولایتي دفتر مسوول ډاکټر اریا باور وایي، کولرا یوه میکروبي اسهالي ناروغي ده چې د چاپیریالي حفظ الصحې نه مراعاتولو په نتیجه کې په خلکو کې خپرېږي.
هغه زیاته کړه: «د دې ترڅنګ چې زموږ ټیمونه پنځو ولسوالیو ته استول شوي څو د درملنې او درملو وېش برخه کې خلکو ته وړیا خدمت وکړي، کوچني تبلیغي ټیمونه مو هم چمتو کړي څو کلیوالي سیمو کې خلکو ته له اوبو د استفادې څرنګوالي او هغې د پاک ساتلو برخه کې هم معلومات ورکړي.»
هغه زیاته کړه، په دغو ولسوالیو کې د کولرا ناروغۍ د خپرېدو اصلي لامل د خلکو له خوا د ویالو او حوضونو له اوبو استفاده ده چې د دغې ناروغۍ پر مکروبونو ککړې دي.
د جوزجان ولایت د اقچې ولسوالۍ اوسېدونکي شهزاده وویل: «دوه ماشومان مې پر کولرا اخته دي چې دواړه اوسمهال د اقچې په روغتون کې تر درملنې لاندې دي، موږ په کلي کې د څښاک پاکو اوبو ته لاسرسی نه لرو او کومې اوبه چې استفاده کوو د حوض اوبه دي.»
نوموړی وایي، نن دوه کسان د اقچې ولسوالۍ له روغتون څخه د هغوی کلي ته راغلي او د حوض اوبو کې یې کلورین واچول او خلکو ته یې سپارښتنه وکړه چې لږ تر لږه له خامو اوبو استفاده ونه کړي.
د دغه ولایت د خانقا ولسوالۍ اوسېدونکي خیرمحمد هم وویل، ډېر شمېر خلک پر کولرا ناروغۍ اخته شوي دي.
نوموړي د دې ناروغۍ خپرېدل د اندېښنې وړ وباله او په اړه یې د عامه پوهاوي د زیاتولو غوښتنه وکړه.
غړيYou need to subscribe to view the full article. Please login or register a new account.
