<p style="text-align: justify;">غزني (پژواک، ۱۶ زمری ۱۴۰۱): په غزني ښار کې پر نشهيي توکو د روږدو کسانو د درملنې د دوو مرکزونو مسوولین وايي، په دې وروستیو کې د وسایلو له کمښت سره مخ شوي چې د دوی خدمات یې ټکني کړي دي.</p>
<p style="text-align: justify;">پر نشهيي توکو د روږدو د درملنې یاد دوه مرکزونه یو ۵۰ بستریز روغتون او بل سراپا کلینک دی چې په غزني ښار کې فعالیت کوي.</p>
<p style="text-align: justify;">د روږدو د درملنې د مرکزونو ولایتي مشر ډاکټر بصیر احمد امیرزي پژواک خبري اژانس ته وویل، څه باندې لس میاشتې کېږي چې په دغه ولایت کې د روږدو د درملنې مرکزونه د وسایلو له کمښت سره مخ دي او په ډېر کړاو د روږدو درملنې ته دوام ورکوي.</p>
<p style="text-align: justify;">هغه زیاته کړه، په غزني ولایت کې د روږدو کسانو د درملنې دوه مرکزونه- چې یو یې ۵ بستریز روغتون او بل یې سراپا کلینک دی - د درملو، خوراکي توکو، جامو او قرطاسیې له جدي کمښت سره مخ دي.</p>
<p style="text-align: justify;">دی وايي، دغه ستونزې په ټوله کې د دوی خدمات ټکني کړي دي.</p>
<p style="text-align: justify;">امیرزي وویل: «د وسایلو د کمښت ترڅنګ ډاکټرانو او نورو کارمندانو ته د شپږو میاشتو معاش هم نه دی ورکړل شوی او معلومه نه ده چې وروسته به ورکړل شي که نه؛ ځکه اوسني حکومت د معتادینو برخې ته هیڅ ډول بودجه نه ده ځانګړې کړې.»</p>
<p style="text-align: justify;">د نوموړي په خبره، مخکې یادو شوو دواړو مرکزونو ته د افغانستان له پراختیايي بودجې پیسې ځانګړې کېدلې او ترڅنګ یې یو شمېر موسسو هم مرسته کوله؛ خو اوسمهال هیڅ ملاتړې سرچینه نه لري.</p>
<p style="text-align: justify;">خو دی وايي، پر یادو شوو ستونزو سربېره یې په محدودو وسایلو په تېرو لسو میاشتو کې د غزني د امنیې قوماندانۍ په همکارۍ د ۱۰۰۰ روږدو کسانو درملنه یې کړې او ۱۰۰ کسان لا هم تر درملنې لاندې دي.</p>
<p style="text-align: justify;">نوموړی زیاتوي، په دغه روغتیايي مرکز کې د روږدو د درملنې موده د هغوی روغتیايي حالت ته په کتو له ۱۵ تر ۴۵ ورځو ده چې ترڅنګ یې د هغوی د خوراک چاره هم د دوی پر غاړه ده.</p>
<p style="text-align: justify;">امیرزی له چارواکو غوښتنه کوي چې د دوی د وسایلو د کمښت ستونزه حل کړي او کارمندانو ته پر وخت معاش ورکړي، څو وکولای شي خلکو ته لازم خدمات وړاندې کړي.</p>
<p style="text-align: justify;">بلخوا، پر نشهيي توکو د روږدو کسانو د درملنې د سراپا کلینک مسوول قاري محبتالله هم وايي چې د درملو او اړینو وسایلو له کمښت سره مخ دي.</p>
<p style="text-align: justify;">هغه زیاته کړه، دوی تر ډېره په کورونو کې د نشهیانو درملنه کوي؛ همدا اوس یې هم په ډېرو کمو وسایلو په کورونو کې ۵۶ نشهیان تر درملنې لاندې نیولي دي.</p>
<p style="text-align: justify;">خو ده یادونه وکړه چې که حکومت ورسره د درملو او نورو اړتیا وړ توکو مرسته و نه کړي، نو فعالیت به یې په ټپه ودرېږي.</p>
<p style="text-align: justify;">دغهراز ده غوښتنه وکړه چې په غزني کې دې د ښځینه معتادینو د درملنې لپاره هم ځانګړی مرکز جوړ شي؛ ځکه په دې برخه کې هم هیڅ راز اسانتیاوې نشته.</p>
<p style="text-align: justify;">د غزني د عامې روغتیا رییس مولوي محمدحنیف مصباح د روږدو د درملنې په مرکزونو کې د درملو او نورو وسایلو کمښت مني او وايي، دا ستونزه یې د حل لپاره له اړوند وزارت سره شریکه کړې ده.</p>
<p style="text-align: justify;">هغه پژواک خبري اژانس ته وویل، که څه هم د عامې روغتیا ریاست له یادو شوو مرکزونو سره د درملو په برخه کې څه نا څه مرسته کوي خو بسنه نه کوي.</p>
<p style="text-align: justify;">دی وايي، په وار وار یې له نړۍوالو روغتیايي بنسټونو هم د یادو شوو مرکزونو د اکمال او تجهیز غوښتنه کړې، خو تر اوسه یې مثبت ځواب نه دی تر لاسه کړی.</p>
<p style="text-align: justify;">بلخوا پر نشهيي توکو روږدي کسان خوښ دي چې په یادو شوو روغتیايي مرکزونو کې یې درملنه روانه ده، خو له چارواکو غواړي چې له دغو مرکزونو سره د درملو او نورو اړینو وسایلو مرسته وکړي څو خدمات یې لا ښه شي.</p>
<p style="text-align: justify;">سرور خان چې له تېرو شپږو کلونو راهیسې پر نشهيي توکو روږدی دی او شاوخوا یوه میاشت کېږي چې د روږو د درملنې په مرکز کې تر درملنې لاندې دی، پژواک خبري اژانس ته وویل، په هغه ډول یې درملنه نه کېږي چې پخوا کېدله.</p>
<p style="text-align: justify;">دی له مسوولینو غواړي چې د درملنې پر مهال د دوی درملو، خوراک او جامو ته جدي پام وکړي.</p>
<p style="text-align: justify;">د پیر محمد په نوم پر نشهيي توکو روږدی بل کس وايي، په یو وخت د خوراک لپاره نیمه ډوډۍ او په څلورویشت ساعتونو کې یو ځل درمل ورکول کېږي، په داسې حال کې چې پخوا درې وخته پوره خواړه او دوه وخته درمل ورکول کېدل.</p>
<p style="text-align: justify;">هغه زیاته کړه: «نشه مې پرې ایښې ده، بدن مې درد کوي، ډېر په تکلیف یم، خو پوره خواړه او درمل نه راکول کېږي، چارواکي دې زموږ دې ستونزې ته پام وکړي.»</p>
<p style="text-align: justify;">په غزني کې پر نشهيي توکو د روږدو وګړو د درملنې یوازیني دوه مرکزونه په داسې حال کې د درملو او نورو وسایلو له کمښت سره مخ دي چې په مرکز او ولسوالیو کې د ۱۰زره کورنیو په ګډون ۱۳۰زره کسان پر نشهيي توکو روږدي دي.</p>
