ترینکوټ (پژواک، ۱۹ زمری ۱۴۰۱): د اروزګان د پوهنې ریاست وايي، دا مهال د دغه ولایت د زدهکوونکو پر وړاندې تر ټولو لویه ستونزه په ښوونځیو کې د څښاک اوبو نشتوالی دی.
د اروزګان په مرکز ترینکوټ او ولسوالیو کې شاوخوا ۳۱۵ لومړني، منځي ښوونځي او لېسې شته چې زرګونه هلکان او نجونې پکې پر زدهکړو بوخت دي.
د پوهنې ریاست مسوولین وايي، دا مهال د ولایت په کچه د ښوونځيو د ښوونکو او تدریسي موادو د کمښت ستونزه هواره شوې، خو یوه لویه ستونزه چې لا هم زدهکوونکي ورسره مخ دي، په ښوونځيو کې د څښاک د پاکو اوبو نشتوالی دی.
په دې اړه د پوهنې رییس مولوي حقنما پژواک خبري اژانس ته وویل، د دغه ولایت د ۳۱۵ ښوونځيو له جملې یوازې ۸۰ ښوونځيو ته د یونیسف ادارې له خوا د څښاک او لاس مینځلو د اوبو ټانکرونه ورکول شوي، خو پاتې نور ټول ښوونځي د څښاک لپاره د اوبو برمې او زېرمې نه لري.
هغه وایي، پر دې سربېره په مرکز او ولسوالیو کې د ۳۲ هغو ښوونځیو - چې ودانۍ یې د تېرو جګړو له امله نړېدلې وې - زرګونه زدهکوونکي په موقتي توګه په خېمو او یا جوماتونو کې تدریسي بهیر مخ ته وړي.
حقنما وايي، اوس مهال په اروزګان ولایت کې د ښوونکو او تدریسي موادو تشه ډکه شوې او دوه ورځې مخکې د پوهنې وزارت له خوا دغه ولایت ته شاوخوا ۲۰۰زره درسي کتابونه رالېږل شوي چې ژر به پر زدهکوونکو ووېشل شي.
دغهراز ده یادونه وکړه چې څه باندې ۲۲زره ټوکه دیني کتابونه چې د «اسلامي امارت» له خوا تازه د لومړي تر درېیم ټولګي د زدهکوونکو لپاره چاپ شوي هم را رسېدلي دي.
د پوهنې رییس له یونیسف او نورو مرستندویه ادارو وغوښتل چې د اروزګان د پوهنې له ریاست سره دې په ښوونځیو کې د پاکو اوبو په برابرولو او د ویجاړو شوو ښوونځیو د ودانیو په جوړولو کې مرسته وکړي.
په اروزګان کې د یونیسف ادارې مسوول ډاکتر احمد فواد پژواک خبري اژانس ته وویل، دغه اداره تر دې مهاله توانیدلې چې د پوهنې له ریاست سره په بېلابېلو برخو کې همکاري وکړي او دا هڅې به روانې ساتي.
هغه زیاتوي، تر دې وړاندې یونیسف د اروزګان په ۸۰ ښوونځيو کې د لاس مینځلو لپاره د اوبو زېرمې جوړې کړي او په زرګونو بېلابېل تدریسي او روغتیايي توکي وېشلي دي.
د ده په خبره، یادې شوې ادارې نن هم د دغه ولایت د پوهنې له ریاست سره د لاس مینځلو د ۲۰زره صابونونو، ۴۸۵ ټوکه عربي کتابونو او بېلابېلو توکو چې قلمونه، تباشیر، قرطاسیه او نور په کې شامل دي، مرسته وکړه.
فواد وایې، یونیسف به هڅه وکړي چې د دغه ولایت له پوهنې ریاست سره په ښوونځیو کې د څښاک اوبو د برابرولو په برخه کې مرسته وکړي.
