کابل (پژواک، ۲۲ زمری ۱۴۰۱): نن په کابل ښار کې یو شمېر ښځو لنډ لاریون وکړ او د «کار، ډوډۍ او ازادۍ» شعارونه یې ورکول؛ خو امنیتي کسانو یې د دوام مخه ونیوه.
دغه لاریون نن د کابل ښار صدارت څلور لارې سره شوی.
په ټولنیزو رسنیو کې د دغه لاریون وېډیوګانې لاس په لاس کېږي.
په دغو وېډیوګانو کې ښکاري چې لاریونکوونکې مېرمنې له ځان سره بېلابېل شعارونه لېږدوي چې په کې لیکلي شوي «کار، ډوډۍ، ازادي» او «موږ ښځې بیداره یو او له تبعیض څخه بیزاره یو.»
په وېډیوګانو کې ښکاري چې امنیتي کسان هوایي ډزې کوي او ورسره لاریونوالې خورې ورې کېږي.
حکومتي سرچینو تر اوسه په دې اړه څه نه دي ویلي.
تر دې مخکې هم ځېنو ښځو په کابل کې لاریونونه کړي وو، خو حکومتی چارواکو بیا، بیا ویلي چې ښځو ته د شریعت په چوکاټ کې د حقوقو ورکولو ته ژمن دي.
