ګردېز (پژواک، ۲۲ زمری ۱۴۰۱): د پکتيا د ډنډپټان ولسوالۍ یو شمېر اوسېدونکي او سوداګر وايي، د دغې ولسوالۍ او خیبر پښتونخوا لار له دوو اونیو راهيسې بنده ده او خلکو ته يې ډېرې ستونزې جوړې کړې دي.
له یادې لارې د افغانستان او پاکستان ترمنځ سوداګریز مالونه لېږدول کېږي او کراچۍ بندر ته هم غځېدلې ده.
د پکتيا ولایت د ډنډپټان ولسوالۍ په ګمرک کې د روزيالدین وردګ په نامه یوه سوداګر نن (د زمري ۲۲مه) پژواک خبري اژانس ته وویل: «موږ د ډبرو سکرو درې موټر راوستلي، دوه اونۍ کېږي چې د لارې خلاصون ته انتظار يو، خو تراوسه د لارې په اړه هېڅ معلومات نلرو چې کله به خلاصه شي.»
نوموړی وايي، په دې سرحدي سيمه کې پر ډبرو سکرو بار موټرو په ګډون نور په زرګونه موټر ولاړ دي او ورځ تر بلې سوداګریز موټر راځي چې په سيمه کې يې د تم کېدو امکان نشته.
ده وویل: «د دواړو هېوادونو حکومتونو او لوړپوړو چارواکو ته په کار ده چې د عامو خلکو تجارت او کاروبار ته زيان ونه رسوي او دا تجارتې لار دې ژر خلاصه کړي.»
د پکتيا په ياد ګمرک کې يو بل موټرچلوونکی حاجي قسيم ورته خبره کوي او وايي چې د لارې بندېدو له امله له سختو ستونزو سره مخ دی.
نوموړی وايي، د دغه ګمرک دواړو خواوو ته پر سوداګریزو مالونو بار زرګونه موټرونه ولاړ دي.
په ډنډپټان ولسوالۍ کې ګڼ ناروغان او ناروغلرونکي هم د يادې لارې پرانیستو ته په تمه دي.
د حکمتالله په نوم يوه ناروغلرونکي پژواک اژانس ته وويل: «زما پلار چې د وينې سرطان لري او هر څو مياشتې وروسته يې پېښور ته وړم، خو اوس پنځه ورځې کېږي چې لار بنده ده.»
نوموړی وايي، د ده د پلار په څېر ډېر نور عاجل ناروغان شته چې روغتيايي وضیعت يې ښه نه دی او د لته په هوټلونو کې په بد حالت کې شپې او ورځې تېروي.
بلخوا د افغانستان د ماليې وزارت د ګمرکاتو عمومي ریيس مفتي عبدالمتین سعید - چې د ډنډپټان ولسوالۍ له ګمرک څخه يې ليدنه کوله - پژواک ته وويل: «دغه لاره د پاکستان له لوري بنده شوې، زموږ له لوري کوم مشکل نشته، خو د لارې د خلاصون په اړه د لوړپوړو چارواکو ترمنځ هڅې روانې دي او ممکن ژر خلاصه شي.»
نوموړي وويل، د لارې د بندېدو له امله ډېری سوداګرو ته زيانونه اوښتي او دوی له مقابل لوري غواړي چې دغه لار د سوداګرو او ناروغانو پر مخ پرانيزي.
غړيYou need to subscribe to view the full article. Please login or register a new account.
