Language

Don't you have an account with Pajhwok Afghan News?

Click here to subscribe.

د بامیان اوسېدونکي د مخابراتي خدماتو له ټیټ کیفیته شکایت لري

بامیان (پژواک، ۲۶ زمری ۱۴۰۱): د بامیان اوسېدونکي په دغه ولایت کې د مخابراتي خدماتو له ټیټ کیفیته شکایت لري او له مسوولینو غواړي چې دغې ستونزې ته رسېدنه وکړي.

د دغه ولایت د مرکز اوسېدونکی حسین‌علي وایي، په بامیان کې مخابراتي خدمتونه ورځ تر بلې خرابېږي او مسوولینو هم د حل لپاره یې کوم اقدام نه دی کړی.

هغه ادعا وکړه: «کله چې په ام‌ټي‌ان سیمکارت چاته زنګ وهو، لومړی خو اړیکه نه ټینګېږي، کله چې اړیکه تینګه شي نو بیا تر څو دقیقو پورې غږ د پوهېدو وړ نه وي، اړ کېږو چې بیاځلي اړیکه ونیسو.»

د یاد ولایت یوه بل اوسېدونکي نجیب‌الله پژواک ته وویل، د انټرنټي لوړې بيې ته په کتو، د انټرنټ د برابرولو لپاره د مخابراتي شرکتونو خدمات ډېر کمزوري دي.

هغه ادعا وکړه: «شاوخوا یوه اونۍ کېږي چې د دغه ولایت په مرکز کې د سلام شبکې انټرنټي خدمات غېر فعال دي او په ځینو مواردو کې د انټرنټ خدمات دومره کمزوري کېږي چې حتی د فېسبوک پاڼه هم نه خلاصوي.»

د بامیان دغه اوسېدونکي له اړوندو مسوولینو تمه لري چې د مخابراتي ستونزو د هواري برخه کې اقدام وکړي.

د باميان ولايت د مخابراتو ریيس رحمت‌الله سلمان په دغه ولايت کې د مخابراتي خدمتونو برخه کې د ستونزو په منلو سره پژواک ته وویل: «په باميان ولايت کې د اريبا، روشن، سلام، اتصالات او افغان بیسيم مخابراتي شرکتونو ١١٦ سايټونه فعاليت لري چې د دغه ولایت شاوخوا ۹۰ سلنه اوسېدونکي تر پوښښ لاندې نیسي چې له دې ډلې ۳۸ سایټونه 3G او پاتې نور یې2G  انټرنټي خدمات وړاندې کوي.»

د هغه په باور، د مخابراتي ترافیکو زیاتوالی، د اړتیا وړ پرزو نشتوالی، ټرانزیټي ستونزې او د کافي برېښنا نشتوالی د مخابراتي خدماتو د ټیټ کیفیت اساسي لاملونه ګڼل کېږي.

نوموړي زیاتوي، د ستونزو د حل په موخه يې له اړوندو برخو سره خبرې کړې، څو په هغو سيمو کې چې خلک له مخابراتي خدمتونو بې برخې دي، نوي مخابراتي سايټونه جوړ کړي.

GET IN TOUCH

SUGGEST A STORY

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

PAJHWOK MOBILE APP

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.