مهترلام (پژواک، ۱۰ وږی ۱۴۰۱): د لغمان چارواکي وايي، نن د دغه ولایت په مرکز مهترلام کې د ۳۱ میلیون افغانیو په ارزښت د پاکو اوبو رسولو یوه شبکه ګټې اخيستنې ته وسپارل شوه او د دوو نورو پروژو کار پيل شو.
د دغه ولایت والي قاري زینالعابدين عابد پژواک خبري اژانس ته وویل، نن د ملګرو ملتونو له ماشومانو د ملاتړ صندوق (یونیسف) په مالي مرسته د مهترلام ښار په بابا کمپ کې د ۲۱۰ کورونو لپاره د ۱۰ میلیون افغانيو په ارزښت د پاکو اوبو رسولو یوه شبکه ګټې اخيستنې ته وسپارل شوه.
نوموړي زیاته کړه چې هممهاله د دغه ښار په سنګرمېنه او سلطان غازي بابا ښارګوټي کې هم، د ۲۷۰۰ کورنیو لپاره د پاکو اوبو برابرولو د دوو شبکو د جوړولو کارونه پيل شول چې په خبره یې ټولیز لګښت يې ۲۱ میلیون افغانۍ اټکل شوی دی.
ده وویل، د یادو دوو پروژو لګښت هم د یونیسف له خوا ورکول کېږي.
د سیمې خلک د حکومت له دغه اقدامه هرکلی کوي، خو وايي چې دغه شبکې د دوی د اوبو اړتيا نشي پوره کولای.
د سنګر مېنې اوسېدونکي محمدنبي پژواک اژانس ته وویل: «موږ خوښ یو چې حکومت او یونیسف راته د پاکو اوبو رسولو شبکه جوړه کړې، خو دا زموږ لپاره بسنه نه کوي او له حکومته غواړو چې د پاکو اوبو په برابرولو کې موږ ته پاملرنه زیاته کړي.»
ده زیاته کړه، په سيمه کې يې دوه زره کورنۍ ژوند کوي چې په وینا يې د اوسنۍ شبکې وړتیا کمه ده او د دوی لپاره بسنه نه کوي.
GET IN TOUCH
NEWSLETTER
SUGGEST A STORY
PAJHWOK MOBILE APP