<p style="text-align: justify;">بامیان (پژواک، ۱۷ وږی ۱۴۰۱): د بامیان ولایت د برېښنا شرکت مسوولین وایي، که پېرودونکي خپل د برېښنا بېلونه تحویل نه کړي، د برېښنا مزي به یې پرې شي.</p>
<p style="text-align: justify;">په بامیان ولایت کې د برېښنا شرکت رییس ملا ضیاالله جهادیار وایي، تر اوسه د دغه شرکت پېرودونکو څه باندې ۱۶میلیون ۷۰۰زره افغانۍ د برېښنا بلونه نه دي تادیه کړي او دغه موضوع د برېښنا رسولو سیستم له جدي ستونزو سره مخ کړی دی.</p>
<p style="text-align: justify;">د هغه په وینا، سره له دې چې دغه موضوع څو ځلې پوروړو ته په لیکلي او شفاهي توګه رسول شوې، خو که پاملرنه و نه شي دغه اداره اړ کېږي چې د مرکزي دفتر له هدایت سره سم د هغوی د برېښنا مزي پرې کړي.</p>
<p style="text-align: justify;">هغه زیاتوي، یوازې د دغه ولایت په مرکز کې د برېښنا شرکت ۴ لمریزې او یوه جنراتوري شبکه چې د ۵/۱ میګاواټه برېښنا ظرفیت لري، برېښنا وېشلې چې پر دولتي ادارو او سوداګریزو سیمو سربېره د دغه ولایت د مرکز ۲۵ سلنه اوسېدونکي تر پوښښ لاندې راولي.</p>
<p style="text-align: justify;">د هغه په وینا، په سوداګریزو سیمو کې د برېښنا بيه ٤٥ افغانۍ او د استوګنې سيمو کې د هر کيلوواټ بیه له ١٦ تر ٢٥ افغانيو پورې ټاکل شوې چې شاوخوا ١١ ميليونه یې په دولتي ادارو پورې اړه لري.</p>
<p style="text-align: justify;">خو د دغه ولایت د مرکز اوسېدونکي چې له دولتي برېښنا استفاده کوي، د برېښنا د بیو لوړوالی په ټاکلي وخت د برېښنا د بل د نه تادیه کېدو یو لامل ګڼي.</p>
<p style="text-align: justify;">نبي عليزاده د مرکز اړوند د "ریک شاد" کلي اوسېدونکي پژواک خبري اژانس ته وویل: «په دغه هستوګنیزه سیمه کې د هر کیلوواټ برېښنا بیه ۲۵ افغانۍ ده او موږ له څو ګروپونو پرته نور وسایل نه شو کارولی؛ ځکه چې موږ یې د بل پرې کولو توان نه لرو.»</p>
<p style="text-align: justify;">د هغه په باور، د هر کیلوواټ په بدل کې ۲۵ افغانۍ د هېواد په کچه تر ټولو ډېره لوړه بیه ده چې په باميان کې له استوګنیزو سیمو څخه اخيستل کېږي.</p>
<p style="text-align: justify;">نوموړی له چارواکو غواړي څو دغې موضوع ته پاملرنه وکړي؛ ځکه خلک په اوسنیو شرایطو کې په دغه بیه د برېښنا د لګښت د ورکړې توان نه لري.</p>
