پلخمري (پژواک، ١٩ وږی ۱۴۰۱): د بغلان د کرنې رياست مسوولين وايي، سږ کال په دغه ولايت کې ٤٥٠ ټنه د پستې حاصلات راټول شوي چې د تېر کال په پرتله زياتوالى ښيي.
د بغلان د کرنې رياست د طبيعي سرچينو امر رازمحمد احمدزي پژواک خبري اژانس ته د يوې ځانګړې مرکې په ترڅ کې وويل چې تېر کال په دغه ولايت کې د پستو له ونو ٣٠٠ ټنه حاصلات ترلاسه شوي وو، خو سږ کال يې کچه ٤٥٠ ټنو ته لوړه شوې ده.
هغه وايي، سږ کال خلکو د پستې د ځنګلونو په ساتنه کې همکاري کړې، نو ځکه يې د حاصلاتو کچه هم لوړه ده.
د نوموړي د معلوماتو له مخې، د پستې دغه حاصلات د خلکو لهخوا راټول شوي چې ٢١ ټنه عشر يې د کرنې رياست ته ورکړل شوى دى.
ده زياته کړه: «سږ کال وچکالي وه، نو د دې لپاره چې له کروندګرو سره همکاري وشي، تېر کال مو لسمه برخه عشر اخيستى و خو سږ کال مو بيا شلمه برخه عشر واخيست.»
همدارنګه د دهنهغوري ولسوالۍ د پشهقول کلي اوسېدونکي عبدالجبار پژواک ته وویل چې سږ کال د پستې د حاصلاتو کچه د نورو کلونو په پرتله لوړه ده.
ده وويل: «خلکو ته ويل شوي چې د پستې له ځنګلونو ساتنه وکړي، بيا يې حاصل درکول کېږي، هماغسې وشول خلکو يې ساتنه وکړه او بيا په بدل کې پسته ورکړل شوه؛ نور کلونه به ماته لس يا ١٢ منه پسته رسېدله، خو سږ کال مې ٢٥ منه پسته ترلاسه کړې.»
خو د مرکزي بغلان ولسوالۍ د کرنیزو توکو د ترویج مدیر مولوي معاذ بیا وايي چې د پستې د ټولولو پرمهال له عامو خلکو سره سم چلند نه دى شوى.
دى وايي: «ځایي خلکو سږ کال د پستې ځنګلونو په ساتنه کې پوره همکاري کړې وه، ژمنه هم دا وه چې تر پخېدو به هیڅوک د پستې ونې ته لاس نه وروړي، خو دغه ژمنه د کرنې ریاست له خوا پر ځنګلونو د موظف شویو کسانو له خوا ماته شوه، هغوی تر ځایي خلکو چې زحمت یې ویستی و ډېره پسته یوړه.»
د يادونې ده چې پسته د افغانستان د مهمو محصولاتو له ډلې څخه ده چې هر کال د نړۍ بېلابېلو مارکېټونو ته صادرېږي.
غړيYou need to subscribe to view the full article. Please login or register a new account.
