<p style="text-align: justify;">هرات (پژواک، ۲۳ وږی ۱۴۰۱): د هرات د حوزوي روغتون یو شمېر مراجعین د دغه روغتون په بېلابېلو څانګو کې د ښځینه ډاکترانو له کمښته شکایت کوي او د هرات له عامې روغتیا ریاسته غواړي چې یاده ستونزه هواره کړي.</p>
<p style="text-align: justify;">دغه مراجعین چې ډېری یې ښځې دي، ټینګار کوي چې د هرات په حوزوي روغتون کې د ښځینه ډاکترانو د کمښت له امله دوی له ګڼو ستونزو سره مخ دي او ډېری مهال نه شي کولای نارینه ډاکتر ته ورشي.</p>
<p style="text-align: justify;">د هرات ښار د پنځلسمې ناحیې اوسېدونکې او د حوزوي روغتون يوې ناروغې شبنم دغه موضوع تاییدوي او له پژواک سره په خبرو کې یې وويل، د دغه روغتون په ډېرو برخو کې نارينه ډاکتران دي او ښځينه ډاکترانې کمې ليدل کېږي.</p>
<p style="text-align: justify;">د شبنم په خبره، د هغې او په شان یې د نورو خلکو اقتصادي وضعيت دومره ښه نه دی چې د درملنې لپاره کلينيکونو او يا شخصي روغتونونو ته ولاړ شي او په ځينو مواردو کې اړتيا ده چې خپلې ستونزې او ناروغۍ له ښځينه ډاکترانو سره شریکې کړي.</p>
<p style="text-align: justify;">بله مېرمن حميرا چې رواني ستونزه لري وايي، د نورو څانګو په پرتله په دغه څانګه کې د ښځينه ډاکټرانو کمښت ډېر محسوسېږي.</p>
<p style="text-align: justify;">حمیرا زیاتوي: «زموږ په ټولنه کې ښځې کولای شي خپلې ستونزې او ناروغۍ په اسانۍ سره ښځینه ډاکترې ته ووايي، خو دا ممکنه نه ده چې نارینه ډاکتر ته د خپلې ستونزې یا ناروغۍ په اړه په سمه توګه ووایي.»</p>
<p style="text-align: justify;">د هغې په وینا چې په ټولو برخو کې بايد د ښځينه ډاکترانو شمېر ډېر شي.</p>
<p style="text-align: justify;">د هرات په حوزوي روغتون کې د ښځینه ډاکترانو د شمېر کموالي په دغه ولایت کې مدني فعالان هم اندېښمن کړي دي.</p>
<p style="text-align: justify;">په ورته مهال، د هرات ولایت یو مدني فعال ولياحمد وايي چې د ښځو درملنې لپاره غوره ده چې ښځینه ډاکتره موجوده وي.</p>
<p style="text-align: justify;">هغه له حکومته غواړي چې په روغتيایي برخه کې د ډېرو ښځينه ډاکترانو ګومارلو ته جدي پاملرنه وکړي، څو ښځې د هرات دغه تر ټولو ستر روغتيايي مرکز ته د ورتلو پر مهال له ستونزو سره مخ نه شي.</p>
<p style="text-align: justify;">د هرات د حوزوي روغتون یو شمېر کارکوونکي هم په دغه روغتون کې د ښځینه ډاکترانو د کموالي پخلی کوي.</p>
<p style="text-align: justify;">د هرات د حوزوي روغتون سرطبیب ډاکټر محمدعارف جلالي هم له پژواک سره په خبرو کې په دغه روغتون کې د ښځينه ډاکټرانو کمښت مني او زیاتوي چې دې چارې ښځینهوو ته د خدماتو وړاندې کولو په برخه کې دوی له جدي ستونزو سره مخ کړي دي.</p>
<p style="text-align: justify;">د هرات حوزوي روغتون سرطبیب زیاته کړه، اوسمهال په دغه روغتون کې ۸۶۱ روغتیايي کارمندان کار کوي چې له ډلې یې یوازې ۳۵ سلنه ښځینه کارمندانې دي.</p>
<p style="text-align: justify;">جلالي څرګنده کړه، هڅه کوي څو په نوي تشکیل کې په بېلابېلو څانګو کې د ښځینه ډاکټرانو د کمښت ستونزه حل کړي او دغهراز په دې هڅه کې دي چې د دغه روغتون د بسترونو شمېر له ۶۵۰ څخه ۱۰۰۰ ته لوړ کړي چې په دې سره به په دغه روغتیايي مرکز کې د ښځينه کارمندانو د کمښت ستونزه حل شي.</p>
<p style="text-align: justify;">هغه وویل: «هغه ښځې چې په حوزوي روغتون کې کار کوي، ټرېنرانې، نرسانې، قابلې او د ټکنیشن او خدماتو برخې کارمندانې پکې شاملې دي او په نوي تشکیل کې زموږ لاس ازاد دی څو د ښځینه ډاکټرانو د کمښت ستونزه حل کړو.»</p>
<p style="text-align: justify;">ځينې ښځينه ډاکټرانې هم پر دې باور دي چې ډېری ښځې دا ښه بولي چې د یوه نارینه ډاکټر پرځای ښځينه ډاکټرې ته ورشي.</p>
<p style="text-align: justify;">د یاد ولایت یوه ډاکټره سهیلا حسیني وايي، حکومت باید په دغه روغتیايي مرکز کې د ښځينه ډاکټرانو د جذب لپاره زمینه برابره کړي، څو د ښځو روغتیايي ستونزو ته پر وخت او ښه توګه رسېدنه وشي.</p>
<p style="text-align: justify;">ډاکټر سهیلا حسیني زیاتوي، ځینې ښځې له نارینه ډاکټرانو سره د ارامۍ احساس نه لري او خپل درد په اسانۍ سره ورته نه شي بیانولای، نو پر دې اساس د ښځينهوو په څانګه کې د روغتیايي کارکوونکو ډېرول یوه اړینه او حتمي چاره ده.</p>
<p style="text-align: justify;">له دې ټولو سره سره، په یاد روغتون کې د ښځینه ډاکټرانو د نه شتون له امله ډېری کسان اړ کېږي چې په ډېر لګښت سره شخصي کلینیکونو ته ولاړ شي.</p>
<p style="text-align: justify;">د هرات حوزوي روغتون د هېواد په لوېدیځه حوزه کې تر ټولو ستر روغتیايي مرکز دی چې ناروغانو ته د نسبتاً قناعت وړ خدماتو وړاندې کولو له امله تر ډېره د شاوخوا ولسوالیو او ګاونډیو ولایتونو لکه بادغیس، فراه، غور او نیمروز خلک دغه روغتون ته مراجعه کوي.</p>
