کندهار کې د معتادینو درملنې سل‌بستریز روغتون د امکاناتو نشتوالي له امله فعالیت درولی

کندهار (پژواک، ۲۳ وږی ۱۴۰۱): په کندهار کې د نشه یي توکو د روږدو درملنې د یوازېني سل‌بستریز روغتون خدمات په داسې حال کې ټکني شوي چې په دغه ولایت کې شاوخوا ۱۲۰ زره کسان پر نشه‎‏‌يي توکو روږد دي.

د عامې روغتیا ریاست د نشه یي توکو د کنټرول مدیر سردارولي ذیشان پژواک خبري اژانس ته وویل، د کندهار ښار په نهمه ناحیه کې د روږدو یوازېنی سل‌بستریز روغتون دا مهال دومره امکانات نه لري چې پر نشه روږدي کسان بستر کړي او درملنه یې وکړي.

هغه وايي، له تېرو شپږو میاشتو راهیسې دغه روغتون له یوې اندازې درملو پرته نور هیڅ امکانات نه لري او  مالي ملاتړ کوونکي موسسات یې له افغانستانه وتلي دي.

ده زیاته کړه: «په دغه روغتون کې په تېرو شاوخوا لسو کلونو کې ۶۰ زره معتادین تداوي شوي خو اوس مهال دلته غذايي توکي نشته چې بستر ناروغانو ته ورکړل شي؛ ځکه د دغه مرکز فعالیت ډېر کم شوی او یوازې ځینو پر نشه روږدو کسانو ته مشورې ورکوي.»

نوموړي وویل، د عامې روغتیا وزارت هڅه کوي دغه روغتون ته کوم ډونر یا مالي ملاتړي پيدا کړي خو که پيدا نه شي نو بیا به یې د روغتیا وزارت په خپله بودجه فعال کړي.

د هغه په وینا، په کندهار کې دا مهال ۱۲۰۰ روږدي په مرکزي محبس او ځینو نورو شخصي روغتیايي مرکزونو کې ساتل کېږي او د ځینو درملنه هم کېږي.

دی وایي: «اوس مهال په مرکزي محبس کې ۱۱۰۰ معتادین ساتل کېږي چې په کې ۴ ماشومان او اته تنې ښځې دي، ۱۰۰ نور معتادین بیا په شخصي کلینیکونو کې تداوي کېږي.»

د کندهار اوسېدونکي د معتادینو درملنې د یا روغتون فعالیت درېدو خواشیني کړي او وايي، په دغه ولایت کې د زرګونو معتادینو شتون ته په کتو اړتیا ده چې نه یوازې دغه روغتون بېرته فعال شي، بلکې نور روغتونونه دې هم جوړ شي.

د کندهار ښار د کابل دروازې یوه اوسېدونکي عبدالواسع پژواک خبري اژانس ته وویل، دا د ډېرې اندېښنې وړ خبره ده چې په یوه ولایت کې دې ۱۲۰ زره کسان پر نشه‌يي توکو روږد وي خو د درملنې لپاره یې هیڅ امکانات نه وي.

هغه زیاته کړه، حکومت باید نه یوازې نشه‎يي توکو ته د معتادینو د اسانه لاسرسي مخنیوی وکړي، بلکې د هغوی درملنې لپاره داسې روغتونونه جوړ کړي چې د نارینه معتادینو ترڅنګ د ښځینه معتادینو درملنه هم په کې وشي.

په کندهار کې پر نارینه وو سربېره ګڼ شمېر ښځې هم پر نشه‎يي توکو روږدې دي چې ډېرې یې په کورونو کې دي او څوک ترې خبر نه دي.

نور بي‎بي یوه هغه ښځه ده چې له شاوخوا اتو کلونو راهیسې نشه‎یي توکي کاروي خو له یو کال راپه دېخوا یې هیرویین پرېیښي او اوس یوازې تریاک خوري.

دا وایي، خاوند یې ایران ته تللی و، هلته پر نشه روږدی شوی و، کله چې راغی دا یې هم پر نشه‌يي توکو روږدې کړه.

هغې پژواک ته وویل: «زما اته اولادونه دي، مېړه مې په نشه‎يي توکو اخته کړم، د ماښام ګوله نه لرو، دی خپله چې هر شی په لاس ورشي غلا کوي یې، ما اوس نوره نشه پرېیښې ده چې طالبان راغلي بیا مي هیرويين نه دي پيدا کړي، بېرېږم، نه یم پسې تللې، اوس تریاک خورم.»

نازدانه بله ښځه ده چې له خاوند سره یو ځای له تېرو لسو کلونو راهیسې پر نشه‎يي توکو روږدې وه.

هغه وایي، خاوند يې اوس مهال په محبس کې بندي دی او دې خپله له تېرو درېیو میاشتو راهیسې نشه پرېیښي ده.

دې زیاته کړه: «خاوند مې بندي دی، زه اوس د نورو کورو څخه ډوډۍ راټولوم او د خلکو کالي مینځم څو خپل اولادونه ورباندې وساتم.»

دا وایي، اووه اولادونه یې دي او دومره څوک نشته چې مرسته ورسره وکړي یا یې هم د خاوند درملنه وکړي.

پر نشه‌یي توکي روږدي کسان وایي، باید په کندهار کې د نشه‎یانو درملنې مجهز روغتون جوړ شي چې د نارینه وو ترڅنګ د ښځینه نشه‎یانو درملنې امکانات هم ولري.