د بغلان امر بالمعروف ریاست: ښځې دې حجاب مراعات کړي

<p style="text-align: justify;">پلخمري (پژواک، ۲۷ وږی ۱۴۰۱):  د بغلان امر بالمعروف ریاست د دغه ولایت په مرکز پلخمري کې د حجاب د ارزښت په اړه جوړه شوې غونډه کې له ښځو د حجاب مراعاتولو غوښتنه وکړه.</p>

<p style="text-align: justify;">دغه غونډه نن د بغلان پوهنتون په تالار کې جوړه شوې وه چې د امر بالمعروف او نهي عن‌المنکر ریاست غړو او د پوهنتون سلګونه ښځینه محصلینو په کې برخه اخيستې وه.</p>

<p style="text-align: justify;">د بغلان د امر بالمعروف ریاست مرستیال مولوي نجیب‎الله عابد ښځو ته په خطاب کې وویل چې له کلونو راهيسې د دوى موخه په افغانستان کې د ښځو حقونو خوندیتوب و.</p>

<p style="text-align: justify;">هغه وايي چې زرګونو کسانو ځانونه قرباني کړل، افغانستان يې خپلواک کړ څو ښځو ته اسلامي حقوق ورکول شي.</p>

<p style="text-align: justify;">ده له ښځو غوښتنه وکړه چې د حجاب مراعاتولو لپاره دې جدي هلې ځلې وکړي.</p>

<p style="text-align: justify;">دغه راز د بغلان پوهنتون د شريعاتو پوهنځي رييس مولوي عبدالوحد لياقت وويل چې ډېرو کسانو د ښځو د دفاع په نوم د افغان ښځو د بې پردې کولو هڅې وکړې خو بريالي نه شول.</p>

<p style="text-align: justify;">ده وويل چې د ښځو عزت په حجاب کې دى، د بغلان پوهنتون ښځينه محصلينې دې په ټوله معنا حجاب مراعات کړي.</p>

<p style="text-align: justify;">دغه راز د بغلان پوهنتون يوې محصلې ناديه وويل چې اسلام ښځو ته د حجاب حکم کړى ښځې يې بايد مراعات کړي.</p>

<p style="text-align: justify;">په افغانستان کې د اسلامي امارت له حاکمېدو وروسته دا لومړى ځل دى چې د امر بالمعروف رياست په بغلان کې د يوې غونډې پر مهال له ښځو د حجاب مراعاتولو غوښتنه کوي.</p>

<p style="text-align: justify;"></p>