پکتيکا کې د ۵۰ ميليونه افغانیو په لګښت يوه مدرسه جوړېږي

<p style="text-align: justify;">ښرنه (پژواک، ۲۹ وږی ۱۴۰۱): د پکتيکا په مرکز ښرنه کې د خلکو په ۵۰ ميليونه افغانيو شخصي لګښت يوه ديني مدرسه جوړېږي چې شاوخوا ۵۰۰ نجونو او هلکانو ته به په کې د ديني او عصري زده‌کړو زمينه برابره شي.</p>

<p style="text-align: justify;">د «شمس المدارس» په نوم د دغې جوړېدونکې مدرسې مشر مفتي غلام محی‌الدين خدام پژواک خبري اژانس ته وويل، دا مدرسه - چې د زده‌کوونکو لپاره تدریسي ودانۍ، لیلیه، اداري خونې او د ښوونکو لپاره کورونه په کې شامل دي - پر ۷ جریبه ځمکه د ۵۰ میلیونه افغانیو په لګښت جوړېږي چې ځمکه او لګښت دواړه د خلکو له خوا ورکول کېږي.</p>

<p style="text-align: justify;">هغه زیاته کړه، په دغه مدرسه کې به هلکانو او نجونو ته د دیني او عصري زده‌کړو اسانتیاوې برابرې شي.</p>

<p style="text-align: justify;">د مرکز ښرنې اوسېدونکي خوشحاله دي چې د لوڼو او زامنو د ښوونې او روزنې لپاره یې د زده‌کړې مرکز جوړېږي.</p>

<p style="text-align: justify;">د حاجي محمد‌الله په نوم یوه قومي مشر په دې اړه پژواک خبري اژانس ته وویل: «دغسې کارونه د ستایلو دي، موږ همدا غواړو چې لورانې او زامن مو باسواده شي.»</p>

<p style="text-align: justify;">دی د سرپرست حکومت د پوهنې وزارت له چارواکو غوښتنه کوي چې په هېواد کې د نجونو د زده‌کړو پر وړاندې شته خنډونه لرې کړي او له شپږم ټولګي پورته د نجونو ښوونځي دې پرانیزي.</p>

<p style="text-align: justify;">د پکتيکا په مرکز کې د نجونو او هلکانو د ديني او عصري زده‌کړو لپاره مدرسه داسې مهال جوړېږي چې له تېر يوه کال راهيسې په هېواد کې له شپږم ټولګي پورته د نجونو ښوونځي تړل شوي چې چارواکو یې لامل کلتوري ستونزې یادې کړې دي.</p>