ترینکوټ (پژواک، ۵ تله ۱۴۰۱): د اروزګان اوسېدونکي وايي، په دغه ولایت کې دې د اوبو مهارولو او کرنې د ودې په موخه بندونه جوړ شي.
هغوی زیاتوي، په اروزګان کې څو داسې سیمې شته چې درې لوی او یو شمېر واړه بندونه په کې جوړېدای شي چې نه یوازې زرګونه هکتاره ځمکه خړوبولای شي، بلکې برېښنا هم تولیدولای شي.
د مرکز ترینکوټ اړوند د نچین سیمې یوه اوسېدونکي شریفالله پژواک خبري اژانس ته وویل، که څه هم په دغه ولایت کې د اوبو درې سیندونه غځېدلي خو اروزګانیانو ته یې هیڅ ګټه نه ده رسېدلې.
هغه زیاته کړه، هر کال د بېموسمه اورښتونو له امله په دغو سیندونو کې د اوبو ډېرېدل خلکو ته زیانونه اړوي، خو ګټه یې بیا ګاونډیو هېوادونو ته رسېږي.
دی وايي، که پر دغو سیندونو په مناسبو ځایونو کې بندونه جوړ شي، نو نه یوازې اوبه به مهار شي، بلکې کرنه به هم وده وکړي.
د ده په خبره، په تېر جمهوري نظام کې مسوولینو په وار وار ژمنې وکړې چې په دغه ولایت کې د اغا جان، منغار او تنګي پر لویو او یو شمېر نورو وړو بندونو کار پیلوي، خو تر پایه دا کار و نهشو.
د اروزګان د دهراوود ولسوالۍ یو اوسېدونکی محمدنسیم بیا غوښتنه کوي چې حکومت او مرستندویه ادارې دې په دې ولسوالۍ کې د تنګي بند جوړ کړي، څو تر مرکز ترینکوټ پورې زرګونه جریبه شاړې ځمکې خړوبې او کرنې ته چمتو شي.
هغه پژواک اژانس ته وویل، موده مخکې له مرکز کابل څخه د دغه بند د جوړولو په موخه یو پلاوی راغلی و خو بیا یې هیڅ څرک و نه لګېد.
دی شکایت کوي چې نه د دهراوود ولسوالۍ د تنګي بند جوړ شو او نه هم د دې ولسوالۍ خلکو د هلمند د کجکي بند کومه ګټه ولیده چې د دې ولسوالۍ په ګاونډ کې پروت دی.
د ده په وینا، کلونه مخکې د کجکي بند د لوړېدو له امله د دې ولسوالۍ د اوسېدونکو کرنیزې ځمکې او کورونه تر اوبو لاندې شول، خو نه تر اوسه بدیل ورکړل شو او نه د دغه بند له برېښنا برخمن شول.
ځايي مسوولین مني چې د اروزګان په مرکز او ولسوالیو کې د اوبو مهارولو په موخه درې بندونه شته چې په تړل کېدو به یې نه یوازې زرګونه هکتاره ځمکې خړوبې شي، بلکې برېښنا به هم تولید کړي.
د اروزګان مرستیال والي مولوي مزمل پژواک خبري اژانس ته وویل، دوی په دې اړه څو ځله له مرکز سره خبرې کړې او د خلکو دا غوښتنې یې شریکې کړې دي.
ده هیله وښوده چې مرکزي اداره به د خلکو دغو غوښتنو ته مثبت ځواب وايي او د امکاناتو له موندلو سره به په دغه ولایت کې د بندونو جوړولو چارې پيلوي.
موده مخکې د اوبو او انرژۍ سرپرست وزیر اروزګان ته د خپل سفر پر مهال ویلي وو، هڅه کوي چې لویې پروژې د خپلو داخلي عوایدو او افغان سوداګرو په مالي مرستو پلې کړي.
عبدالطیف منصور دا څرګندونې د یاد ولایت په چنارتو ولسوالۍ کې کړې چې له تېرو څلورو لسیزو راهیسې په کې د اوبو د یوه بند جوړولو پلان شته.
د اوبو دغه بند د مرکز ترینکوټ او چنارتو ولسوالۍ ترمنځ په اغا جان سیمه کې دی چې په تړلو او جوړولو سره به یې، زرګونه هکتاره شاړې او دښتي ځمکې خړوبې او کرکیلې ته چمتو شي.
اروزګان د هېواد په سوېل کې هغه ولایت دی چې په تېرو شلو کلونو کې د پراخو جګړو او ناامنیو ډګر و او له همدې امله په کې هیڅ راز پرمختیايي کارونه نه دي شوي.
